1 Iwe, ewe mwän a aliwinieila ren asamalapen ewe leni lükün Imwenfel a sape ngeni ötiu, nge a kapüng. 2 Iwe, ewe Samol mi Lapalap a üreniei, “Ei asamalap epwe chök kapüng, esap fokun suk, nge esap wor eman epwe tolong lon, pun ngang ewe Samol mi Lapalap, ewe Koten Israel, üa tolong me lon. Iei popun epwe kapüng. 3 Iwe, ewe samol chök epwe tongeni mot lon kengkangan, pwe epwe mongö me mwei ngang ewe Samol mi Lapalap. Epwe tolong lon asamalapen kengkangan, epwe pwal chök towu me lon.”

4 Mürin, ewe mwän a emwenieila ren ewe asamalap mi sape ngeni efeng fän mesen ewe Imwenfel. Nge lupwen üa nengeni, üa küna lingen ewe Samol mi Lapalap a aurala ewe Imwenfelin Kot. Iwe, üa chapetiu lepwül. 5 Iwe, ewe Samol mi Lapalap a üreniei, “Nöün aramas, kopwe nengenifichi ren mesom o aüselingöchü ren selingom meinisin mine üpwe aiti ngonuk usun pwüngün angangen ewe Imwenfel me allükün meinisin. Nge kopwe tümwünüfichi, pwe kopwe sileöchü iön epwe tufichin tolong lon ewe Imwenfel, ika iön esap tufichin tolong.

6 Iwe, kopwe apasa ngeni ekewe chon Israel mi lükümach o ü ngeniei, pwe iei aloi ngang Kot ewe Samol mi Lapalap: Ämi chon Israel, iei oupwe ükütiu le föri ämi föför mi anioput. 7 Pun oua mwüt ngeni chon ekis pwe repwe tolong lon ai leni mi pin o apiningaua, ir resap sirkomsais, resap pwal aleasochisiei. Iwe, lupwen ra nom, oua pwal eäni asoren mongö ngeniei, asoren kiris me cha. Ren ei oua awateela ämi föför mi anioput o ataela ämi pwon ngeniei. 8 Iwe, ousap püsin föri angangen lon ai leni mi pin, pun oua awisa chon ekis pwe repwe föri.

9 Iei mine ngang Kot ewe Samol mi Lapalap üa apasa: Esap wor eman chon ekis epwe tolong lon ai leni mi pin, pun ir resap sirkomsais, resap pwal aleasochisiei. Iwe, esap fokun wor mwo nge eman chon ekis mi nom lein chon Israel epwe tolong. 10 Nge ekewe mwän seni ewe ainangen Lefi mi kul seniei, lupwen ekewe chon Israel ra tok seniei o angang ngeni ar kewe uluulun anümwäl, repwe angei liwinin ar tipis. 11 Pun pwüngün pwe repwe chök angang lon ai leni mi pin, repwe mamasa asamalapen Imwenfel o tümwünü ekewe lusun angang. Repwe niela ekewe mönün asoren kek me sokun mönün asor aramas ra uwato, repwe pwal alisi aramas o angang ngeniir. 12 Nge pokiten ra föri fel fän iten ekewe aramas me mwen ar kewe uluulun anümwäl o emwenalong ekewe chon Israel lon tipis, iei mine üa pwon fän akapel pwe repwe fokun angei liwinin ar tipis. Ngang Kot ewe Samol mi Lapalap üa kapas. 13 Resap fokun tongeni feito rei pwe rewe föri angangen eman souasor ngeniei, resap pwal tongeni arap ngeni ai kewe mettoch mi pin me ai kewe asor mi unusen pin. Iwe, repwe mwärelong fän itengau pokiten ekewe föför mi anioput ra föri. 14 Nge üpwe awiseer pwe repwe föri ekewe angangekis meinisin lon ewe Imwenfel.

15 Nge ekewe souasor seni ewe ainangen Lefi, ir mwirimwirin Satok mi allükülük le föri angangen leniei mi pin, lupwen chon Israel ra tok seniei, repwe feito rei o angang ngeniei. Iwe, repwe ütä fän mesei o asor ngeniei kirisin me chan ekewe mönün asor. Ngang Kot ewe Samol mi Lapalap üa kapas. 16 Ir chök repwe tolong lon leniei mi pin o kan ngeni ai rongen asor, pwe repwe föri ar angang ngeniei. 17 Iwe, lupwen ra tolong lon asamalapen ewe leni mwen Imwenfel, repwe üföüf üf mi pwechepwech, nge resap üföüf och üf seni ülen sip, lupwen ra angang lon ewe leni mwen Imwenfel ika lon Imwenfel. 18 Repwe filiti mökürer ngeni mangaku mi pwechepwech, repwe pwal aea rauses seni mangaku mi pwechepwech, nge resap üföüf üf ra pwichikar o molon ren. ✡Eks 28.39-43; Lif 16.4 19 Iwe, mwen ar towu lon ewe leni lükün Imwenfel ren aramas, repwe pwilitawu ekewe üf ra üföüf, lupwen ra angang ngeniei, o iseniir lon ar kewe rum mi pin. Iwe, repwe üföüf och sokun üf, pun ekewe üf ra pin ngeni aramas. ✡Lif 16.23 20 Ekewe souasor resap räisöü mökürer, resap pwal alangatama, pwe repwe chök fichiöchü. ✡Lif 20.5 21 Esap wor eman souasor epwe ünümi wain mwen an tolong lon ewe leni mwen Imwenfel. ✡Lif 10.9 22 Esap wor eman epwe pwülüeni eman fefin mi mä pwülüan ika eman fefin mi mwü seni pwülüan, pwe epwe chök pwülüeni eman föpwül seni ekewe ainangen Israel esamwo pwüpwülü me mwan, ika eman fefin mi mä pwülüan, pwülüen eman souasor. ✡Lif 21.7,13-14 23 Iwe, ekewe souasor repwe aiti ngeni nei aramas kana lefilen mine a pin me mine esap pin, repwe pwal aiti ngeniir usun ar repwe alefila mine a limengau me mine a limöch. ✡Lif 10.10 24 Repwe eäni kapwüng lon eu fitikoko, nge repwe apwüngala pwüngün kapwüng ren pwüngün ai allük. Repwe tümwünüöchü ai kewe allük usun pwüngün ekewe ränin chulap, repwe pwal pinini pinin ai ränin sapat. 25 Iwe, esap wor eman souasor epwe kan ngeni eman somä, pwe esap püsin alimengaua, chilon chök ren somän saman me inan, nöün mwän me fefin, pwiin pwal fefinan resamwo pwüpwülü. ✡Lif 21.1-4 26 Nge lupwen eman souasor epwe limöchsefäl seni an limengau ren eman somä, epwe pwal witiwit fisu rän mwen an epwe tolongsefäl lon Imwenfel. 27 Iwe, lon ränin an tolong lon ewe leni mwen Imwenfel pwe epwe föri an angang lon, epwe föri asoren amusamusen an tipis, ngang Kot ewe Samol mi Lapalap üa kapas.

28 Iwe, ekewe souasor esap wor wiser fanü, pun ngang chök wiser. Ousap ngeniir och wöür lon Israel, pun ngang wöür. ✡Num 18.20 29 Nge repwe mongö seni ekewe asoren mongö, asoren amusamusen tipis, pwal seni asoren amusamusen pupungau. Iwe, meinisin mine ekewe chon Israel ra fangala ngeniei, epwe än ekewe souasor. 30 Iwe, mwen uän fotar irä meinisin, pwal sokun asor meinisin ra uwato repwe än ekewe souasor. Repwe pwal ngeni ekewe souasor mwen öüwäer pilawa seni mwen uän fotar wiich, pwe feiöch epwe nonom won imwer. ✡Num 18.8-19 31 Nge ekewe souasor resap fokun ochoch och fituken machang ika man mi püsin mäla ika mäla ren manmwacho.” ✡Lif 22.8