1 Iwe, Jesus a üra, “Enlet, üpwe wesewesen ürenikemi: Iö esap tolong lon asamen lenien sip, nge a tötä me ekis o tolong, i eman chon solä me eman chon achomau. 2 Nge iö mi tolong lon ewe asam, ina i ewe chon masen sip. 3 Ewe chon masen ewe asamen lenien sip epwe suki ngeni ewe asam. Ekewe sip repwe rong mwelian lupwen epwe köri iten eman me eman nöün kewe sip, iwe, epwe emweniirewu lükün. 4 Lupwen epwe emweniirewu lükün, epwe akom mwer. Iwe, ekewe sip repwe tapwela mürin, pun ra silei mwelian. 5 Resap tapwela mürin pwal eman me lükün, nge repwe sü seni, pun resap silleni mwelian.” 6 Jesus a apworausa ngeniir ei pworausen awewe, nge ir resap wewe ren.

7 Iei mine Jesus a apasasefäli, “Enlet üpwe wesewesen ürenikemi: Ngang ewe asam fän iten ekewe sip. 8 Chokewe meinisin ra akomwoto mwei ir chon solä me chon achomau, nge ekewe sip resap aüseling ngeniir. 9 Ngang ewe asam. Iö a tolong lon ei asam epwe küna manau. Epwe tolong o towu o küna anan. 10 Eman chon solä a chök feito pwe epwe sosolä me ninni me akkatai. Ngang üa feito pwe oupwe eäni manau, iei ewe manau mi somwola.

11 “Ngang ewe chon mas mi öch. Ewe chon mas mi öch a fangala manauan fänäsengesin ekewe sip. 12 Nge ewe aramas mi mö, i esap ewe chon mas mine nöün kewe sip, lupwen a küna pwe eman wolif a feito, a likitala ekewe sip o süla. Mürin ewe wolif a turufi ekewe sip o atoropaseer. 13 Ewe aramas a süla, pun i eman mi mö, esap ekieki manauen ekewe sip. 14 Ngang ewe chon mas mi öch. Ngang üa silei nei sip kana o ir ra sileei, 15 usun chök Semei a sileei o ngang üa silei Semei. Iwe, ngang üa fangala manauei fänäsengesin ekewe sip. ✡Mat 11.27; Luk 10.22 16 A pwal wor ekoch nei sip resap nonom lon ei lenien sip. Ngang üpwe pwal fokun emweniireto. Repwe aüseling ngeni mweliei. Mürin epwe wor eu chök mwichen sip me eman chon mas.

17 “Iwe, Semei a echeniei, pun üa fangala manauei pwe üpwe angeesefäli. 18 Esap wor eman epwe angei seniei manauei, nge üa fangala seni püsin letipei. Mi wor ai pwüüng ai üpwe fangala, a pwal wor ai pwüüng ai üpwe angeesefäli. Iei usun mine Semei a allük ngeniei, pwe üpwe föri.”

19 Iwe, pokiten ekei kapas ekewe chon Juta ra pwal kinikinfesen lefiler. 20 Chomong me leir ra apasa, “Eman anün rochopwak a wäni! A umwesila! Pwota oua aüseling ngeni?” 21 Nge pwal ekoch ra apasa, “Ekei kapas esap alon eman aramas eman anün rochopwak a wäni! Ifa usun, eman anün rochopwak epwe tongeni aneneloi mesen chon chun?”

22 Iwe, a fis ewe chulapen Efinunen ewe imwenfel lon Jerusalem. 23 Lon ena otun a tori fansoun patapat. Lupwen Jesus a fetal lon ewe Pwalangen Salomon me lon ewe lenien imwenfel, 24 ekewe chon Juta ra rongeela o aisini, “Ifa langatamen fansoun om kopwe chök likitikem lon äm tipemwaramwar? Are en Kraist, kopwe afataöchü ngenikem.” 25 Jesus a pölüeniir, “Üa fen ürenikemi, nge ousap lüküei. Ekewe föför üa föri fän iten Semei ra pwärätä usi. 26 Nge ämi ousap lükü, pun ousap nei kewe sip. 27 Nei kewe sip ra aüselinga mweliei, üa pwal sileer, nge ir ra tapweto müri. 28 Üa fang ngeniir manau esemüch, nge ir resap fokun pöütmwälila. Esap wor eman a tongeni ettiir me lepei. 29 Semei a ngeniei ekei sip, o i a lap seni meinisin, iwe, esap wor eman a tongeni ettiir seni lepöün Semei. 30 Ngang me Semei eman chök.”

31 Mürin ekewe chon Juta ra pwal angei fau pwe repwe mone ngeni. 32 Jesus a üreniir, “Üa föri chomong föför mi öch mwen mesemi, Semei a ngeniei pwe üpwe föriir. Meni lein ekewe föför oua mochen mone ngeniei fau ren?” 33 Iwe, ra pölüeni, “Äm aisap mochen mone ngonuk fau fän iten och föför mi öch, nge pokiten om kapasen turunufas ka apasa. Pun en eman aramas chök, nge ka püsin ekieki pwe en Kot.” ✡Lif 24.16 34 Jesus a pölüeniir, “A mak lon ämi puken Allük pwe Kot a apasa, ‘Ämi oua kot.’ ✡Kölf 82.6 35 Kich sia silei pwe kapasen ekewe Toropwe mi Pin ra let tori feilfeilachök. Iwe, Kot a aita ngeni ekei aramas kot, ir chokewe ra angei an Kot kapas. 36 Nge me rei, Semei a apiniei o tinieito won fanüfan. Epwe ifa usun ämi oupwe tongeni apasa pwe üa eäni kapasen turunufas, pokiten üa apasa pwe ngang Nöün Kot? 37 Ousap lüküei are üsap föri ekewe föför Semei a mochen ai üpwe föriir. 38 Nge are üa fen föri ekewe föför, inamwo are ousap lüküei, oupwe fokun lükü ai kewe föför, pwe oupwe silei o weweiti pwe Semei a nom loi, nge ngang üa nom lon Semei.” 39 Iwe, ra sotunisefäli ar repwe turufi Jesus, nge i a müttir sü seniir.

40 Mürin Jesus a liwinsefälila pekilan ewe chanpupu Jortan lon ewe leni ia Johannes a fen papataisi aramas ie me mwan. Iwe, a nonom ikenan. ✡Joh 1.28 41 Chomong aramas ra feito ren. Iwe, ra apasa, “Johannes esap föri och manaman, nge meinisin mine a pwärätä usun ei mwän a let.” 42 Iwe, chomong aramas ra lükü Jesus me ikenan.