1 Mürin ekei pworaus, ewe Samol a pwal filätä fik me ruoman mwän o a tiniirela akaruoman pwe repwe akomwola mwan lon ekewe telinimw me leni meinisin püsin i epwe feila ie me mürin. 2 Iwe, a üreniir, “Ewe räs a fokun watte, nge ekewe chon angang lon ra chokükün. Iei mine oupwe tüngor ngeni samolun ewe räs, pwe epwe tinala chon angang lon ewe räs. ✡Mat 9.37-38 3 Oupwe feila! Üpwe tinikemiila usun chök nienifön sip lein wolif. ✡Mat 10.16 4 Ousap uwou lenien iseis moni are pwotou are eu pean sus. Ousap üla pwe oupwe kapong me won al. 5 Lupwen oupwe tolong lon eu imw, oupwe akomwen apasa, ‘Kinamwe epwe tori chon ei imw.’ 6 Iwe, are eman aramas mi efich kinamwe a nom ikenan, ämi kinamwe epwe nonom won. Nge are eman esap efich kinamwe, ämi tüngorun kinamwe epwe liwinsefälitikemi. 7 Oupwe chök nonom lon ewe imw, oupwe mongö o ün mine ra etiwa ngenikemi, pun eman chon angang epwe angei liwinin. Ousap feila seni ewe imw oua nom lon o feila ngeni pwal eu. ✡1.Kor 9.14; 1.Tim 5.18 8 Are oua tolong lon eu telinimw o ra etiwakemi, oupwe chök mongö mine ra ngenikemi. 9 Oupwe apöchöküla ekewe chon samau lon ena telinimw o üreni ekewe aramas mi nom lon, ‘Mwün Kot a arapoto remi.’ 10 Nge are oupwe tolong lon eu telinimw, nge resap etiwakemi, oupwe feila won ekewe al o apasa, 11 ‘Ewe mwo pwülün lon ämi telinimw mi pachetä fän pechem aipwe wichiki ngenikemi, pwe eu minen pwärätä ngenikemi. Nge oupwe silei pwe Mwün Kot a arapoto remi.’ ✡Mat 10.7-14; Mark 6.8-11; Luk 9.3-5; Föf 13.51 12 Üpwe ürenikemi, pwe lon ewe ränin kapwüng epwe kisikis feiengauen Sotom seni feiengauen ei telinimw. ✡Ken 19.24-28; Mat 11.24; 10.15

13 “Feiengauom Korasim, feiengauom Petsaita! Pun are ekewe manaman mi fen fis lomi ra fis lon Tirus me Siton, ekewe aramas lon ekei telinimw repwe mottiu me lomlom fän üfer seni tuk o amworatiu falang won mökürer pwe asisilen ar aier seni tipis. ✡Ais 23.1-18; Is 26.1–28.26; Sow 3.4-8; Am 1.9-10; Sek 9.2-4 14 Lon ewe ränin kapwüng epwe kisikis feiengauen Tirus me Siton seni ämi feiengau. 15 Nge en Kapernaum, ka ekieki pwe kopwe püsin atekiokotä tori läng? Apwi, sap ina, kopwe turutiu lon hell!” ✡Ais 14.13-15 16 Iwe, Jesus a üreni nöün kewe chon kaiö, “Iö a aüselingakemi a aüselingaei, nge iö a aliwinikemi, a aliwiniei, nge iö a aliwiniei a aliwini ewe mi tiniei.” ✡Mat 10.40; Mark 9.37; Luk 9.48; Joh 13.20

17 Iwe, ekewe fik me ruoman ra liwinto fän pwapwa chapur. Ra üreni Jesus, “Äm Samol, ekewe anün rochopwak mwo nge ra aleasochisikem, lupwen aia allük ngeniir fän itom.” 18 Nge Jesus a pölüeniir, “Üa küna Satan pwe a turutiu seni läng usun chök fifi. 19 Oupwe rongorong! Ngang üa ngenikemi manaman, pwe oua tongeni puri ekewe serepenit me mönükam, oupwe pwal pworaiti manamanen ewe Chon Oput. Iwe, esap wor och epwe tongeni afeiengauakemi. ✡Kölf 91.13 20 Nge ousap pwapwa pwe ekewe ngününgau ra aleasochisikemi, nge oupwe pwapwa pwe itemi a mak lon läng.”

21 Iwe, lon ewe fansoun Jesus a uren pwapwa ren Ngünmifel o a apasa, “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate. Ewer, Semei, pun iei usun letipom.”

22 “Semei a anomu mettoch meinisin fän nemeniei. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.” ✡Joh 3.35; 10.15

23 Mürin Jesus a kul ngeni nöün kewe chon kaiö o üreniir lupwen ra imwüela, “Feiöchün chokewe mi küna mine ämi oua küna. 24 Pun üpwe ürenikemi, pwe chomong soufos me king ra mochen küna met ämi oua küna, nge resap tongeni. Ra pwal mochen rongorong met ämi oua rongorong, nge resap tongeni.”

25 Iwe, eman Sensen Allük a feito ren Jesus pwe epwe sotuni. A aisini, “Sense, met ngang üpwe föri pwe üpwe manaueni manau esemuch?” 26 Jesus a pölüeni, “Met a mak lon ewe Allük? Met ka aleani?” 27 Iwe, ewe mwän a pölüeni, “Kopwe echeni ewe Samol om Kot ren unusen lelukom, ren unusen ngünum, ren unusen tufichum me unusen ekiekum. Kopwe pwal echeni chon arum usun püsin om echenuk.” ✡Lif 19.18; Tut 6.5 28 Iwe, Jesus a pölüeni, “Mi pwüng mine ka apasa. Iei usun mine kopwe föri, iwe, kopwe manau.” ✡Lif 18.5; Mat 22.35-40; Mark 12.28-34 29 Nge ewe Sensen Allük a mochen pwärala pwe i mi pwüng, iei mine a üreni Jesus, “Iö chon ori?”

30 Iwe, Jesus a pölüeni, “A wor eman mwän a feil seni Jerusalem pwe epwe feitiu Jeriko. Lupwen a fetal won al, ekoch chon solä ra säwu o turufi, ra angei pisekin meinisin, ra awata o likitala pwe a arap ngeni mäla. 31 Iwe, a fis pwe eman souasor a fetaleto won ewe al. Nge lupwen a küna ewe mwän mi feiengau, a rik seni o fetal won ewe al me epek. 32 Pwal ina chök usun eman mwän seni ewe ainangen Lefi. Lupwen an pwerela ewe ie, a pwal küna ewe mwän, nge a rik seni o fetal won ewe al me epek. 33 Nge eman chon Samaria a pwal fetal won ewe al o a tori ewe leni ia ewe mwän mi feiengau a kon ie. Iwe, lupwen a küna, a fokun tongei. 34 Iwe, a feito ren, a epiti kinasan kewe ngeni lö me wain o finiti ngeni wotai. Mürin a ekietä ewe mwän won nöün we man, a uwala ngeni eu imwen wasöla o a tümwünü. ✡2.Kron 28.15 35 Sorotän ewe rän a angei ruoföü föün moni silifer o ngeni mine än ewe imwen wasöla. Iwe, a üreni, ‘Kopwe tümwünü ätei, nge lupwen üpwe liwinsefäliti ikei, üpwe mönätiu meinisin mine esap naf won liwinin.’ ” 36 Mürin Jesus a aisini ewe Sensen Allük, “Met ka ekieki, iö lein ekei ülüman mwän a föri föförün eman chon arun ngeni ätewe mi feiengau ren chon solä?” 37 Iwe, ewe Sensen Allük a pölüeni, “Ewe eman mi eäni kirikiröch ngeni.” Jesus a üreni, “Kopwe feila o föri usun chök met i a föri.”

38 Iwe, lupwen Jesus me nöün kewe chon kaiö ra sopwela ar sai, a tori eu sopw ia eman fefin itan Marta a etiwa i lon imwan ie. 39 Marta a wor eman pwiin itan Maria, neminei a mottiu arun pechen Jesus o aüseling an afalafal. ✡Joh 11.1 40 Nge Marta a fokun osukosuk ren chomong angang a föri. Iei mine a feito ren Jesus o üreni, “Ai Samol, kosap ekieki pwe pwii a atamepichiei ren an likiti ngeniei ekei angang meinisin. Kopwe üreni, pwe epwe alisiei.” 41 Nge ewe Samol a pölüeni, “Marta, Marta, ka öürek o osukosuk ren chomong mettoch, 42 nge eu chök a lomot. Maria a filätä ewe mettoch mi aüchea, esap wor eman epwe angei seni.”