1 Iwe, Jesus a körifengeni nöün kewe engol me ruoman chon kaiö o ngeniir tufich me manaman, pwe repwe asüela anün rochopwak o apöchökülatä ekewe mi samau. 2 Mürin a tiniirela pwe repwe afalafala usun ewe Mwün Kot o apöchökülätä ekewe mi samau. 3 Iwe, a üreniir, “Ousap uwei och lon ämi sai. Ousap uwou wok, pwotou, mongö, moni ika pwal aruachön üfemi. 4 Lon meni imw ra etiwakemi lon, oupwe nonom lon ewe imw tori oupwe towu seni ewe telinimw. 5 Nge lon meni telinimw resap etiwakemi lon, oupwe towu seni o wichikala pwülün fän pechemi, pwe epwe eu minen pwärätä ngeniir pwe ra mwäl.” ✡Luk 10.4-11; Föf 13.51 6 Iwe, ekewe chon kaiö ra feila o saifeil lon ekewe sopw, ra afalafala ewe Pworausen Manau o apöchökülätä ekewe chon samau lon ekewe leni meinisin.

7 Iwe, lupwen Herotes ewe samolun Kalilea a rong usun ekewe mettoch meinisin mi fisitä, a fokun osukosuk, pun ekoch aramas ra apasa pwe Johannes Soupapatais a manausefälitä. 8 Nge ekoch ra apasa pwe Elias a pwä, nge pwal ekoch ra apasa pwe eman me lein ekewe soufosun lom a manauatä. ✡Mat 16.14; Mark 8.28; Luk 9.19 9 Nge Herotes a ais, “Ngang üa pöküela üen Johannes, nge iö ei mwän üa rongorong usun an föri ekei mettoch?” Iwe, Herotes a sotuni an epwe küna Jesus.

10 Iwe, ekewe soukünö ra liwinsefäl o apworausa ngeni Jesus meinisin mine ra föri. Iwe, Jesus a emweniirela ngeni ewe telinimw Petsaita. 11 Lupwen ewe mwichen aramas ra rong usun, ra tapwela mürin. Iwe, Jesus a etiweer o afalafaleer usun Mwün Kot, a pwal apöchöküla chokewe mi samau. 12 Nge lupwen a arapakan tuputiuen akkar, ekewe engol me ruoman chon kaiö ra feito ren Jesus o üreni, “Kopwe tinala ekewe aramas, pwe repwe feila lon ekewe sopw me leni mi arap, pwe repwe küt aner mongö me ar lenien möür, pun ei leni a toau seni lenien aramas.” 13 Nge Jesus a üreniir, “Ämi oupwe ngeniir met repwe mongö!” Iwe, ra pölüeni, “Iei chök ükükün mine a wor rem, limeföü pilawa me ruoman ik. Ka mochen aipwe feila o kamö mongö fän iten ei mwichen aramas?” 14 (A wor ina epwe ükükün limungeröü mwän mi nom ikenan.) Iwe, Jesus a üreni nöün kewe chon kaiö, “Oupwe üreni ekewe aramas pwe repwe mottiu akalime lon eu me eu mwich.” 15 Iwe, mürin än ekewe chon kaiö föri iei usun, 16 Jesus a angei ekewe limeföü pilawa me ekewe ruoman ik, a sachetä läng o iotekin kilisou ngeni Kot wor. A kinikisiretiu o ngeni ekewe chon kaiö, pwe repwe ineti ngeni ekewe aramas. 17 Iwe, ir meinisin ra mongö o mötüla. Mürin ekewe chon kaiö ra amasoua engol me ruu chüük ren lusun ekewe mongö.

18 Lon eu rän, lupwen Jesus a chök emanüla le iotek, nöün kewe chon kaiö ra feito ren. Iwe, Jesus a aisiniir, “Met ewe mwichen aramas ra apasa usi?” 19 Ra pölüeni, “Ekoch ra apasa pwe en Johannes Soupapatais, ekoch ra apasa pwe en Elias, nge pwal ekoch ra apasa pwe en eman lein ekewe soufosun lom a manauatä.” ✡Mat 14.1-2; Mark 6.14-15; Luk 9.7-8 20 Iwe, Jesus a aisiniir, “Nge ämi, iö oua üra pwe ngang?” Petrus a pölüeni, “En Kraist nöün Kot.” ✡Joh 6.68

21 Mürin Jesus a fokun allük ngeni nöün kewe chon kaiö, pwe resap fokun üreni eman ei pworaus. 22 A pwal üreniir, “Nöün Aramas epwe fokun tolong lon riaföü watte, epwe küna koput me ren ekewe souakom, ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.”

23 Mürin a üreni ekewe aramas meinisin, “Are eman a mochen etiei, epwe pölükü manauan, epwe mwärei an iräpenges rän me rän o tapweto müri. ✡Mat 10.38; Luk 14.27 24 Pun iö a mochen amanaua püsin manauan epwe pöüt seni, nge iö a likitala manauan fän itei epwe amanaua manauan. ✡Mat 10.39; Luk 17.33; Joh 12.25 25 Epwe met lomoten än eman aramas epwe feiöchüni feiöchün unusen fanüfan, nge püsin manauan epwe pöüt seni, epwe pwal angei liwinin an tipis. 26 Are eman a säwäsiniei me ai kewe kapas, Nöün Aramas epwe pwal säwäsini lupwen epwe war lon an ling me än Saman ling me än ekewe chon läng mi pin ling. 27 Üpwe allükülükü ngenikemi, pwe mi wor ekoch aramas mi nom ikkei resap mäla tori repwe küna ewe Mwün Kot.”

28 Eu wiik mürin än Jesus apasa ekei mettoch, a emwenala Petrus, Johannes me James o emweniiretä won eu chuk pwe epwe iotek. ✡2.Pet 1.17-18 29 Iwe, lupwen a iotek, wowoon won mesan a wilila, üfan kana ra molupolup o pwechela. 30 Lon ewe chök otun ruoman mwän ra nom ren Jesus o kapas ngeni, ir Moses me Elias. 31 Ätekei ra pwä lon ling seni läng o kapas ngeni Jesus usun an epwe apwönüetä än Kot we akot ren an mäla lon Jerusalem. 32 Petrus me chienan kewe ra fokun möür, nge ra nenela o küna än Jesus ling me ekewe ruoman mwän mi nom ren. 33 Lupwen ekewe ruoman mwän ra feil seni Jesus, Petrus a üreni, “Sounemenem, a fokun öch ach nonom ikei. Aipwe aüetä ülüngat imw mangaku, eu fän itom, eu fän iten Moses nge pwal eu fän iten Elias.” (Petrus esap wesewesen weweiti met i a kapas usun.) 34 Lupwen a chüen kakapas, eu kuchu a pwä o nürün a pwölürela. Iwe, ekewe chon kaiö ra niuokus, lupwen ewe kuchu a feitiu wor. 35 Iwe, eu möngüngü a möngüngüwu me lon ewe kuchu, “Iei i nei üa filätä, oupwe aüselinga.” ✡Ais 42.1; Mat 3.17; 12.18; Mark 1.11; Luk 3.22 36 Iwe, lupwen ewe möngüngü a köüla, ra küna pwe Jesus chök a nom. Nge ekewe chon kaiö ra amwöchü ekei mettoch, nge resap üreni eman met ra küna lon ena rän.

37 Iwe, sorotän ewe rän, lupwen Jesus me ekewe ülüman chon kaiö ra feitiu seni won ewe chuk, eu mwichen aramas mi chomong ra souni. 38 Iwe, eman mwän me lon ewe mwich a kötä, “Sense, üa tüngor ngonuk, kose mochen kopwe alisi nei we ät, pun ina i chök nei. 39 Eman ngün a tötä won, pwe a müttir puchörütä, a achecha tori a puropurowu me lon awan. A chök akafeiengaua, nge esap mochen likitala. 40 Üa tüngor ngeni noumw kewe chon kaiö pwe repwe asüela, nge resap tongeni.”

41 Iwe, Jesus a pölüeni, “Ämi eu täppin aramas mi lükümang o tipesosor. Ifa langatamen fansoun ai üpwe nonom remi o engila ngenikemi?” Mürin a üreni ewe mwän, “Kopwe uwato noumw we ikei.” 42 Lupwen ewe ät a feito, ewe ngününgau a aturätiu lepwül o achecha. Nge Jesus a allük ngeni ewe ngününgau pwe epwe towu seni. Iwe, ewe ät a pöchökületä. Mürin Jesus a aliwini ewe ät ngeni saman. 43 Iwe, ekewe aramas meinisin ra mairü ren än Kot manaman mi pöchökül.

Iwe, lupwen ekewe aramas ra chüen mwar ren ekewe mettoch meinisin Jesus a föri, a üreni nöün kewe chon kaiö, 44 “Ousap manlükala met ei üpwe le ürenikemi. Nöün Aramas epwe tolong lepöün aramas.” 45 Nge ekewe chon kaiö resap weweiti ekei kapas. A monomon seniir, pwe resap tongeni weweiti, nge ra niuokus ar repwe kapas ais ngeni usun.

46 Iwe, a fis eu aninifengen lefilen ekewe chon kaiö won iö epwe lap me leir meinisin. ✡Luk 22.24 47 Nge Jesus a silei met ra eäni ekiek, iei mine a angei eman semirit o aütai lepekin. 48 Iwe, a üreniir, “Iö a etiwa ei semirit fän itei, a etiwaei. Nge iö a etiwaei a pwal etiwa ewe eman a tiniei. Pun iö a kis me leimi meinisin, ina i ätewe a lap mwemi meinisin.” ✡Mat 10.40; Luk 10.16; Joh 13.20

49 Iwe, Johannes a üreni Jesus, “Sounemenem, äm aia küna eman mwän a asüela anün rochopwak fän itom, nge äm aia üreni pwe epwe ükütiu, pun i esap chiechiach.” 50 Iwe, Jesus a üreni Johannes me nöün kewe chon kaiö, “Ousap pinei an angang. Pun eman esap ü ngenikemi, a fitikemi.”

51 Iwe, lupwen a arap ewe fansoun än Jesus epwe le feitä läng, a nom lon letipan an epwe feila Jerusalem. 52 Iwe, a tinala chon kaiö pwe repwe akomwola mwan. Ra feila o tolong lon eu sopw lon Samaria, pwe repwe amolätä mettoch meinisin fän itan. 53 Nge ekewe aramas lon ewe leni resap mochen etiwa, pun ra silei pwe a nom won an sai ngeni Jerusalem. 54 Iwe, lupwen ekewe chon kaiö James me Johannes ra küna ei, ra üra, “Ka mochen pwe äm aipwe köratiu ekkei seni läng, pwe epwe kenala ekei aramas?” ✡2.King 1.9-16 55 Nge Jesus a sap ngeniir o apwüngüür. 56 Mürin Jesus me nöün kewe chon kaiö ra feila lon pwal eu sopw.

57 Iwe, lupwen ra fefetal won al, eman a üreni Jesus, “Ngang üpwe etuk ekis meinisin ia kopwe feila ie.” 58 Jesus a üreni, “Ekewe foks a wor pwanger, ekewe machang a wor faser, nge Nöün Aramas esap wor eu leni ia epwe konola ie o asösö.” 59 Iwe, Jesus a üreni pwal eman mwän, “Kopwe etiei.” Ewe mwän a üreni, “Ai samol, kose mochen kopwe akom mwüt ngeniei ai üpwe feila lon leniei o peiaseni semei.” 60 Nge Jesus a pölüeni, “Kopwe likiti ngeni ekewe mi mäla repwe püsin peiaseni ar kewe somä. Nge en kopwe feila o arongafeili ewe Mwün Kot.” 61 Pwal eman mwän a üra, “Ai samol, üpwe etuk. Nge kopwe akom mwüt ngeniei pwe üpwe feila o kapongen amwirimwir ngeni chon ai famili.” ✡1.King 19.20 62 Jesus a pölüeni, “Eman mi popuetä le tuw pwül nge a nenesefäl, esap fich ngeni ewe angangen Mwün Kot.”