1 Iwe, Jesus a üreni nöün kewe chon kaiö, “Sosot epwe fokun tori aramas pwe repwe tolong lon tipis, nge feiengauen ätewe mi afisätä ekewe sosot. 2 Epwe fen öch ngeni ewe aramas pwe epwe riritä fän üan eföü fau mi föümong o epwe koturutiu le matau, lap seni an epwe afisätä sosot ngeni eman me lein ekewe kükün pwe epwe tipis. 3 Iei mine oupwe tümwünüöchü mine oupwe föri! Are pwiüm a tipis, kopwe apwüngü, nge are a ekieksefäl, kopwe amusala. ✡Mat 18.15 4 Are a tipis ngonuk fän fisu lon eu rän, nge iteiten fansoun a feito reöm o ürenuk, ‘Üa ekieksefäl,’ kopwe fokun amusala an tipis.”

5 Iwe, ekewe chon künö ra üreni ewe Samol, “Kopwe alisikem pwe äm lükü en epwe wattela.” 6 Ewe Samol a üreniir, “Are epwe wor ämi lükülük mi wewe ngeni eföü pwükilin irä mi fokun kükün, oupwe tongeni üreni ei irämong, ‘Kopwe üttuketä fiti warom o fotukuketiu le matau,’ iwe, epwe aleasochisikemi.

7 “Are eman leimi mi wor eman nöün chon angang mi tuw pwül are tümwünü sip, ifa usun, lupwen epwe liwinto seni lemäl, epwe üreni pwe epwe kaito pwe epwe mongö? 8 Apwi! Nge epwe üreni, ‘Kopwe amolätä anei mongö, anükü üfom o angang ngeniei tori üpwe wes le mongö o ün. Mürin en kopwapw mongö o ün.’ 9 Ifa usun, ewe samol epwe kilisou ngeni nöün chon angang pokiten a aleasochisi mine a akünö ngeni? 10 Ina usun pwal ämi. Lupwen oua wes le föri wisemi meinisin, oupwe apasa, ‘Äm aia chon angang mi lomotongau, aia chök föri mine wisem.’ ”

11 Iwe, lupwen Jesus a fetal ngeni Jerusalem, a pwerela le kiänin Samaria me Kalilea. 12 Nge lupwen Jesus a tori eu sopw, a churi engol mwän mi üriir rupun pwötür. Ra ütä me toau 13 o kökkö fän leüömong, “Jesus äm samol, kopwe tongeekem!” 14 Iwe, lupwen Jesus a küneer a üreniir, “Oupwe feila ren ekewe souasor, pwe repwe nenengenikemi.” Iwe, lupwen ra feila, ra limöchüla seni rupur kewe. ✡Lif 14.1-32 15 Iwe, lupwen eman me leir a küna pwe a pöchökülsefäl, a liwinsefäl o mwareiti Kot fän mwelian mi leüömong. 16 A chapela won pwül arun pechen Jesus o kilisou ngeni. Ätei eman re Samaria. 17 Mürin Jesus a apasa, “A wor engol mwän mi pöchökülsefäl. Ikafa ir ekewe tiweman? 18 Pwota ei chök eman re ekis a liwinsefälito o pwärätä an kilisou ngeni Kot?” 19 Iwe, Jesus a üreni, “Kopwe ütä o feila, om lükülük a apöchökülokotä.”

20 Iwe, ekoch ekewe Farisi ra aisini Jesus ika inet ewe Mwün Kot epwe war. Jesus a pölüeniir, “Ewe Mwün Kot esap feito lon och sokun lapalap ach sipwe tongeni küna. 21 Esap wor eman epwe tongeni apasa, ‘Nengeni a nom ikei,’ are ‘Nengeni, a nom ikenan,’ pun ewe Mwün Kot a nom lon lelukemi.”

22 Mürin Jesus a üreni nöün kewe chon kaiö, “Epwe war ewe fansoun, lupwen oupwe fokun mochen küna eu ekewe ränin Nöün Aramas, nge ousap fokun küna. 23 Iwe, repwe ürenikemi, ‘Nengeni, a nom ikenan!’ are ‘Nengeni, a nom ikei!’ Ousap feila rer, ousap pwal tapwela mürir. 24 Pun usun fifi a fila seni läng o asarama fanüfan seni epek tori epek, iei usun Nöün Aramas lon ränin. 25 Nge akomwan epwe tolong lon riaföü watte o küna koput me ren ei täppin aramasen ikenai. 26 Usun mine a fis lon fansoun Noa, iei usun epwe pwal fis lon ränin Nöün Aramas. ✡Ken 6.5-8 27 Ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw o ewe noter a war o niirela meinisin. ✡Ken 7.6-24 28 Pwal inachök usun ewe fansoun Lot. Aramas ra momongö o ükün, ra kakamö o akamömö, ra fofot o aköüetä imw. 29 Nge lon ewe rän lupwen Lot a towu seni Sotom, ekkei me primston a püngütiu seni läng o niirela meinisin. ✡Ken 18.20–19.25 30 Epwe chök pwal ina usun lon ewe rän Nöün Aramas epwe wareto lon.

31 “Lon ewe rän, eman aramas mi nom won imwan, esap wor an fansoun an epwe tolong lon imwan pwe epwe angei pisekin. Pwal ina chök usun ewe mi nom lemäl, esap wor an fansoun an epwe liwinsefäliti imwan. ✡Mat 24.17-18; Mark 13.15-16 32 Oupwe chechemeni pwülüen Lot! ✡Ken 19.26 33 Iö a mochen amanaua püsin manauan, epwe pöüt seni, nge iö a pölükü manauan, epwe amanaua manauan. ✡Mat 10.39; 16.25; Mark 8.35; Luk 9.24; Joh 12.25 34 Üpwe ürenikemi, lon ewe pwinin ruoman aramas repwe möür lon echö chök kieki. Repwe angeala eman, nge ewe eman repwe likitätiu. 35 Ruoman fefin repwe üsüsfengen, repwe angeala eman, nge ewe eman repwe likitätiu. 36 [Ruoman mwän repwe nonomfengen lemäl, repwe angeala eman, nge ewe eman repwe likitätiu.]” 37 Iwe, ekewe chon kaiö ra aisini Jesus, “Äm Samol, ia epwe fis ie ei?” Jesus a pölüeniir, “Ia a wor ie eman somä, ikenan ekewe machang iter wolcher ra mwichfengen ie.”