“Iei i nei we chon angang üa apöchöküla,

nei üa afili, üa unusen pwapwa ren.

Üa anomu Ngüni won,

nge i epwe awarato pwüng ngeni mwün fanüfan meinisin. ✡Mat 3.17; 17.5; Mark 1.11; Luk 3.22; 9.35

2 Iwe, esap osomong le fos ika alapatä mwelian,

esap pwal leüömong le kapas won ekewe al.

3 Esap kupiela efoch äsät mi puopu,

esap pwal kunuela efoch wiik mi kümochoch.

Iwe, epwe awora pwüng fän allükülük.

4 Esap achanü are mwörürütiu

tori epwe wes me anüküchara pwüng won fanüfan.

Iwe, chon ekewe fanüen lematau ra witiwiti an kewe allük.” ✡Mat 12.18-21

5 Iwe, Kot a föri läng o ameresala,

a alapala fanüfan me meinisin mine a mär won,

a pwal ngeni chon fanüfan ar ngasangas me manau.

Iwe, Kot ewe Samol mi Lapalap a üreni nöün chon angang, ✡Föf 17.24-25

6 “Ngang ewe Samol mi Lapalap, üa filukutä fän wenechar,

üa pwal amwöchü poum o tümwünuk.

Iwe, üpwe föri reöm eu pwon ngeni aramasen fanüfan meinisin,

kopwe pwal uwato saram ngeni chon ekewe mwü won fanüfan. ✡Ais 49.6; Luk 2.32; Föf 13.47; 26.23

7 Iwe, kopwe anelai mesen chon chun,

kopwe angasa chon fötek seni lon imwen fötek,

kopwe pwal apichala chokewe mi nom lon rochopwak.

8 Ngang ewe Samol mi Lapalap, iei chök itei.

Iwe, üsap ngeni eman kot ai ling,

üsap pwal ngeni ekewe uluulun anümwäl ai iteüöch.

9 Nengeni, ra fen pwönüetä ai kewe kapasen osuni seni me lom,

nge iei üpwe pwärätä mettoch mi fö

mwen ar repwe fis.”

10 Oupwe eäni echö köl mi fö ngeni ewe Samol mi Lapalap,

oupwe mwareiti me lesopun fanüfan.

Oupwe mwareiti i, ämi meinisin mi sai lematau,

pwal mönün lon meinisin.

Iwe, ekewe fanüen lematau me chokewe mi nonom wor repwe kölün mwareiti Kot.

11 Ewe fanüapö me telinimwen lon repwe chietä kölün mwareiti Kot,

pwal ekewe sop ia chon ewe ainangen Ketar ra nonom ie.

Chon Sela repwe mweireir fän pwapwa

me won ungen ekewe chuk.

12 Iwe, repwe alinga ewe Samol mi Lapalap

o arongafeili iteüöchün lon ekewe fanüen lematau.

13 Ewe Samol mi Lapalap a feito usun eman chon pwora,

a fokun tiliken le ekiekin maun usun eman sounfiu.

Iwe, a eäni ewe arukaken maun

o pwärawu an pwora ngeni ekewe chon oputan.

“Fansoun langatam üa mosonoson, üa fanafanala o engila.

Nge iei üpwe puchör usun eman fefin mi cheuchen fam,

üpwe ngasalap me mwiengas.

15 Üpwe ataela ekewe chuk meinisin

o apwasa fetilin wor.

Üpwe awili chanpupu ngeni fanüpwas

o amorätä ekewe nomun koluk.

16 Iwe, üpwe emweni chon mesechun won efoch al resap silei,

üpwe afetaleer won ekewe al resamwo fetal won.

Üpwe awili ewe rochopwak mi nom mwer ngeni saram,

nge ekewe leni mi pwüküpwük üpwe awili ngeni leni mi sosonöch.

Ekei mettoch üpwe apwonüetä,

nge üsap likiti och.

17 Nge chokewe mi lükü uluulun anümwäl mi fal,

pwal chokewe mi apasa usun ekewe uluulun anümwäl seni mächä

pwe ir ar kot repwe itengau o fokun säw.”

“Oupwe aüseling, ämi chon selingepüng,

oupwe nenengeni, ämi chon mesechun, pwe oupwe küna.

19 Iö a mesechun usun nei we chon angang,

ika iö a selingepüng usun nei we chon künö ngang üa tini?

Iö a mesechun usun ätewe mi fangala manauan ngeniei,

ika usun nei we chon angang?

20 Israel, ka küna chomong mettoch,

nge kosap tümwünü.

Ka aü selingom, nge kosap rongorong.”

21 Iwe, ewe Samol mi Lapalap a pwapwa le atekiai an allük

o alinga pokiten an pwüng.

22 Nge ekei aramas ra chök mwelele,

pun aramas ra angei pisekir fän pöchökül.

Ir meinisin ra mwöchülong lon pwang

o monolong lon imwen fötek.

Aramas ra liapeniir, nge esap wor eman a amanaueer.

Iwe, chon solä ra uweerela, nge esap wor eman a apasa,

“Oupwe aliwinirela.”

23 Iö leimi epwe aüseling ngeni ekei kapas,

nge iö epwe aüselingafichi lon kan fansoun repwe feito?

24 Iö a asechala Israel lepöün chon solä?

Ifa usun, sap ewe Samol mi Lapalap?

I ewe Kot ra tipis ngeni, resap mochen föri letipan

o aleasochisi an kewe allük!

25 Iei mine Kot a awarato an song won chon Israel

o afeiengaueer lon maun.

Iwe, an song mi usun ekkei a küriir,

nge resap mirit ren,

a keniir, nge resap ekieki usun.