4
1 Nga kwafe sum ye mutun God ac ye mutun Christ Jesus, su ac fah nununku mwet moul ac mwet misa, ac ke sripen el ac tuku leumi oana sie Tokosra: 2 kom in luti pweng wo, ac kom in moniyuk in fahkak in pacl fal ac in pacl sufal. Kom in kaelos su tafongla, aksuwosyalos, akkeyalos, ac mongfisrasr in luti nu selos. 3 Pacl se ac fah tuku ke mwet uh fah tia porongo mwe luti pwaye, a elos fah fahsr tukun ma lungse lalos sifacna, ac akpusye nu selos mwet luti su ac fah luti nu selos ma elos kena lohng. 4 Elos ac srungala lohngyen ma pwaye, ac fah lohang nu ke sramsram lusrongten. 5 A kom in okak in ma nukewa; muteng mwe keok, oru orekma lun mwet fahkak Pweng Wo, ac akfalye ma kunom oana ke kom sie mwet kulansap lun God.
6 A funu nga, nga akola in kisakunla moul luk, tuh apkuran me pacl luk in som liki moul se inge. 7 Nga sang nufon kuiyuk ke akutun luk; nga aksafyela kasrusr luk, ac nga sruokya ku lulalfongi. 8 Ac inge, oasr sie tefuro in kutangla lemla soaneyu, su ma nu sin mwet moul suwohs. Leum, Mwet Nununku suwohs, el fah ase nu sik in Len sac — ac tia nu sik mukena, a oayapa nu selos nukewa su lungse ac tawi sikme lal.
Kas In Wili Lal Pau Nu Sel Timothy
9 Srike ke kuiyom kom in sa in tuku nu yuruk. 10 Demas el fahsr likiyu ac som nu Thessalonica, mweyen el lungse ma lun faclu. Crescens el somla nu Galatia, ac Titus nu Dalmatia.Col 4:14; Phm 24; 2 Cor 8:23; Gal 2:3; Tit 1:4 11 Luke mukena oasr yuruk. Solal Mark elan wi kom tuku mweyen el ku in kasreyu ke orekma uh.Col 4:14; Phm 24; Orek 12:12, 25; 13:13; 15:37–39; Col 4:10; Phm 24 12 Nga supwalla Tychicus nu Ephesus.Orek 20:4; Eph 6:21–22; Col 4:7–8 13 Kom fin tuku, kom use nuknuk loeloes se luk nga tuh likiya Troas yorol Carpus, ac use pac book limlim nutik, ac yokna book ma orekla ke kulun kosro ah.Orek 20:6
14 Alexander, mwet orekma ke osra, el oru ma koluk na lulap nu sik. Leum El ac fah folokin nu sel fal nu ke ma el oru ah.1 Tim 1:20; Psa 62:12; Rom 2:6 15 Sifacna taran kom liki mwet sacn, mweyen el lain na pwaye luti lasr.
16 Ke pacl se emeet ma tuh nununkeyuk nga, wangin sie mwet wiyu lac. Elos nukewa fahsr likiyu. Nga finsrak God Elan tia sang mwatalos ke ma se inge! 17 Tuh Leum el muta yuruk ac akkeyeyu, oru nga ku in sulkakinelik Pweng Wo tuh mwet sayen mwet Jew nukewa in lohng; ac nga painmoulla liki misa. 18 Ac Leum El ac fah moliyula liki ma koluk nukewa, ac El fah loangeyu ac usyuyak nu in Tokosrai lal inkusrao. Lela mwet uh in kaksakunul ac akfulatyal ma pahtpat ac ma pahtpat! Amen.
Kas In Wilkas
19 Lung luk nu sel Priscilla,*Priscilla: ine Greek se, ac Prisca ine Rome, a mutan se na. ac Aquila, ac nu sin sou lal Onesiphorus.Orek 18:2; 2 Tim 1:16–17 20 Erastus el mutana Corinth, ac nga filiya Trophimus in acn Miletus ke sripn el mas.Orek 19:22; Rom 16:23; Orek 20:4; 21:29 21 Kom in sulaklak tuku meet liki pacl mihsrisr.
Eubulus, Pudens, Linus, Claudia, ac oayapa mwet nukewa wiasr in lulalfongi elos supu lung lalos nu sum.
22 Leum elan muta in ngunum.
Lungkulang lun God in oan yuruwos nukewa.
4:10 Col 4:14; Phm 24; 2 Cor 8:23; Gal 2:3; Tit 1:4
4:11 Col 4:14; Phm 24; Orek 12:12, 25; 13:13; 15:37–39; Col 4:10; Phm 24
4:12 Orek 20:4; Eph 6:21–22; Col 4:7–8
4:14 1 Tim 1:20; Psa 62:12; Rom 2:6
*4:19 Priscilla: ine Greek se, ac Prisca ine Rome, a mutan se na.
4:20 Orek 19:22; Rom 16:23; Orek 20:4; 21:29