AMOS
Tukakinyen Book Lal AMOS
Amos pa mwet palu se oemeet inmasrlon mwet palu pus su kas in palu la uh simla in Ma Simusla. El ne sie mwet in siti srisrik se in acn Judah, a el luti nu sin mwet in tokosrai epang, Israel, meet liki yac 750B. C. In pacl se ingo yohk kasrpen acn we, ac mwet uh moniyuk nu ke alu, ac wangin lokoalok. Tusruktu, Amos el akilen lah mwe insewowo inge ma na nu sin mwet kasrup mukena, ac kasrpalos tuku ke inkanek sesuwos, ac ke orekma kutasrik lalos nu sin mwet sukasrup ac mwet munas. El oayapa liye lah moniyuk lalos ke alu uh tia orek ke inse pwaye, ac misla lalos tia misla pwaye, a mwe na lumah. Ke ma inge Amos el arulana pulaik ac moniyuk in fahkak lah God El fah kai mutunfacl sac. El kwafe tuh nununku suwohs in “asrla oana sie unon in kof,” (5:24) ac el fahkak pac mu, “Sahp LEUM GOD El ac fah pakoten nu sin mwet na pu su painmoulla in mutunfacl se inge” (5:15).
Takla Lun Koanon Book Se Inge
Nununkeyuk mwet tulan lun Israel 1:1—2:5
Nununkeyuk Israel 2:6—6:14
Aruruma limekosr 7:1—9:15
1
Pa inge kas lal Amos, sie mwet liyaung sheep, ac el mwet in siti srisrik Tekoa. Yac luo meet liki kusrusr se ma sikyak in acn Israel, God El fahkak nu sel Amos ke ma inge nukewa su ma nu sin mwet Israel. In pacl sac Uzziah el tokosra lun Judah, ac Jeroboam wen natul Jehoash, el tokosra lun Israel. 2 Tok 15:1–7; 2 Chr 26:1–23; 2 Tok 14:23–29
Amos el fahk,
“Pusren LEUM GOD ngirngir Fineol Zion me.
Pusracl kasla oana pusren pulahl Jerusalem me.
Insroan mah uh paola,
Ac sak folfol insroa Fineol Carmel uli.” Jol 3:16
God El Nununku Mutunfacl Atulani Lun Israel
Syria
LEUM GOD El fahk, “Mwet Damascus elos kalweni na in oru ma koluk, ac ke sripa inge pwayena nga fah kalyaelos. Elos arulana sulallal in anwuk nu sin mwet Gilead. Isa 17:1–3; Jer 49:23–27; Zec 9:1 Ouinge nga fah supwala e nu fin lohm sin tokosra su musaiyukla sel Tokosra Hazael, ac nga fah esukak pot ku lal Tokosra Benhadad. Nga fah lipikya mutunpot ke siti Damascus, ac moklela leum lun Betheden ac mwet muta Infahlfal Aven. Mwet Syria ac fah sruhu ac utukla nu Kir.”
Philistia
LEUM GOD El fahk, “Mwet Gaza elos kalweni na in oru ma koluk, ac ke sripa inge pwayena nga fah kalyaelos. Elos usla un mwet puspis ac kukakunulosyang in mwet kohs nu sin mwet Edom. Isa 14:29–31; Jer 47:1–7; Ezk 25:15–17; Jol 3:4–8; Zep 2:4–7; Zec 9:5–7 Ouinge nga fah supwala e nu fin pot kuhlusyen siti Gaza, ac esukak pot ku lun acn we. Nga fah sisla mwet leum lun siti Ashdod ac Ashkelon. Nga fah kalyei siti Ekron, ac mwet Philistia nukewa su lula fah misa.”
Tyre
LEUM GOD El fahk, “Mwet Tyre elos kalweni na in oru ma koluk, ac ke sripa inge pwayena nga fah kalyaelos. Elos usla un mwet puspis nu ke sruoh in acn Edom, ac tia karinganang wuleang in akasrui ma elos tuh orala. Isa 23:1–18; Ezk 26:1—28:19; Jol 3:4–8; Zec 9:1–4; Mt 11:21–22; Lk 10:13–14 10 Ke ma inge nga fah supwala e nu fin pot kuhlusyen siti Tyre, ac esukak pot ku we.”
Edom
11  LEUM GOD El fahk, “Mwet Edom elos kalweni na in oru ma koluk, ac ke sripa inge pwayena nga fah kalyaelos. Elos ukweya mwet wialos mwet Israel, ac tia pakoten nu selos. Kasrkusrak lalos arulana upa, tiana ku in wanginla. Isa 34:5–17; 63:1–6; Jer 49:7–22; Ezk 25:12–14; 35:1–15; Oba 1–14; Mal 1:2–5 12 Ouinge nga fah supwala e nu fin siti Teman, ac esukak pot ku lun Bozrah.”
Ammon
13  LEUM GOD El fahk, “Mwet Ammon elos kalweni na in oru ma koluk, ac ke sripa inge pwayena nga fah kalyaelos. Ke sripen elos kena akyokye acn selos elos som mweuni acn Gilead ac tiyala insien mutan pitutu we. Jer 49:1–6; Ezk 21:28–32; 25:1–7; Zep 2:8–11 14 Ke ma inge nga fah supwala e nu fin pot kuhlusyen siti Rabbah, ac esukak pot ku we. Na ac fah oasr pusren sasa ke len in mweun, ac mweun uh fah ngisyak oana paka se. 15 Tokosra ac mwet pwapa lal fah utukla nu in sruoh.”

1:1 2 Tok 15:1–7; 2 Chr 26:1–23; 2 Tok 14:23–29

1:2 Jol 3:16

1:3 Isa 17:1–3; Jer 49:23–27; Zec 9:1

1:6 Isa 14:29–31; Jer 47:1–7; Ezk 25:15–17; Jol 3:4–8; Zep 2:4–7; Zec 9:5–7

1:9 Isa 23:1–18; Ezk 26:128:19; Jol 3:4–8; Zec 9:1–4; Mt 11:21–22; Lk 10:13–14

1:11 Isa 34:5–17; 63:1–6; Jer 49:7–22; Ezk 25:12–14; 35:1–15; Oba 114; Mal 1:2–5

1:13 Jer 49:1–6; Ezk 21:28–32; 25:1–7; Zep 2:8–11