3
God El Fah Nununku Mutanfahl Uh
1 LEUM GOD El fahk,
“In pacl sac, nga fah folokonak
Ma wo puspis lun Judah ac Jerusalem.
2 Nga fah eisani mutunfacl nukewa
Ac usalosme nu Infahlfal lun Nununku.
Ingo nga fah nununkalos
Ke ma nukewa elos tuh oru nu sin mwet luk.
Elos akfahsryelik mwet Israel nu in mutunfacl saya,
Ac kitalik Israel, facl sik.
3 Elos susfa in konauk lah
Mutunfacl su ac eis mwet sruoh.
Elos moli mutan kosro ke tulik mukul,
Ac moli wain ke tulik mutan.
4 “Tyre, Sidon, ac Philistia nufon, mea kowos srike in oru nu sik uh? Ya kowos srike in folokin molin ma se nu sik? Fin pwaye, nga ac sa na folokonot!3:4–8; Isa 23:1–18; Ezk 26:1—28:26; Amo 1:9–10; Zec 9:1–4; Mt 11:21–22; Lk 10:13–14 3:4–8; Isa 14:29–31; Jer 47:1–7; Ezk 25:15–17; Amo 1:6–8; Zep 2:4–7; Zec 9:5–7 5 Kowos eisla silver ac gold luk, ac usla mwe kasrup luk nu in tempul lowos. 6 Kowos usla mwet Judah ac Jerusalem loesla liki facl selos sifacna, ac kukakunulosyang nu sin mwet Greek. 7 Inge nga fah usalosme liki acn nukewa ma kowos kukakunulosla nu we. Nga ac oru nu suwos oana ke kowos tuh oru nu selos. 8 Nga fah oru tuh mwet Judah in moli wen nutuwos ac acn nutuwos, ac elos ac fah kukakunulosla nu sin mwet Sabean, sie acn oan loessula. Nga, LEUM GOD, fahk ouinge.
9 “Kowos in fahkelik kas inge inmasrlon mutunfacl uh:
‘Akola nu ke mweun.
Solani mwet ku nukewa;
Usani mwet mweun lowos ac takla fahsrot.
10 Tamla mutun osra in pukpuk nutuwos an nu ke cutlass,
Ac mitmit nutuwos an nu ke osra in mweun.
Finne mwet munas, elos in wi pac mweun.Isa 2:4; Mic 4:3
11 Mutunfacl nukewa su raunikutla,
Kowos sulaklak fahsru,
Ac tukeni nu ke infahlfal uh.’ ”
O LEUM GOD, supwama un mwet mweun lom in wi lainulos.
12 “Mutunfacl nukewa enenu in akola
Ac tuku nu Infahlfal lun Nununku.
Ingo, nga LEUM GOD ac fah nununku
Mutunfacl ingan nukewa.
13 Elos arulana koluk;
Pakelosla oana wheat
Ke pacl in kosrani.
Futfutungya oana kowos futungya grape uh
In nien fut wain,
Nwe ke sessesla kahk.”Fwack 14:14–16; Fwack 14:19–20; 19:15
14 Tausin nu ke tausin mwet
Oasr Infahlfal lun Nununku.
Acn we pa len lun LEUM GOD
Fah sa tuku.
15 Faht ac malem lohsrlosrani,
Ac itu uh tila saromrom.
God Fah Akinsewowoye Mwet Lal
16 LEUM GOD El ngutngut Fineol Zion me;
Pusracl ngirngir Jerusalem me, oana pusren pulahl;
Faclu ac inkusrao kusrusr,
Tusruktu, El fah loangela mwet lal.Amo 1:2
17 “Na kowos mwet Israel, fah etu lah nga pa LEUM GOD lowos.
Nga muta Zion, inging mutal sik.
Jerusalem fah sie siti mutal.
Mwet sac fah tiana sifil kutangulla.
18 In pacl sac, ima in grape ac fah afunla fineol uh,
Ac cow uh fah osralik fin inging nukewa:
Infacl nukewa in Judah fah sessesla ke kof.
Sie unon in kof ac fah sororla liki Tempul lun LEUM GOD,
Ac aksroksrokye Infahlfal Acacia.
19 “Egypt ac fah ekla sie acn mwesis,
Ac Edom sie acn sikiyukla,
Mweyen elos tuh mweuni acn lun Judah
Ac onela mwet we finne wangin mwatalos.
20 Tusruktu, ac fah oasr na mwet muta Judah ac Jerusalem nwe tok.
21 Nga fah foloksak kaclos su anwuki;
Nga fah kai mwet ma onelosla.
Ac nga, LEUM GOD, fah muta Fineol Zion.”
3:4 3:4–8; Isa 23:1–18; Ezk 26:1—28:26; Amo 1:9–10; Zec 9:1–4; Mt 11:21–22; Lk 10:13–14
3:4 3:4–8; Isa 14:29–31; Jer 47:1–7; Ezk 25:15–17; Amo 1:6–8; Zep 2:4–7; Zec 9:5–7
3:13 Fwack 14:14–16; Fwack 14:19–20; 19:15