34
[Psalm lal David, Ke El Oru Lumahl Oana Sie Mwet Wel Ye Mutal Abimelech, Pwanang Abimelech El Supwalla]
Psalm In Kaksakin Wolana Lun God 1 Sam 21:13–15
1 Nga ac fah sang kulo nu sin LEUM GOD pacl e nukewa;
Nga ac fah tiana tui in kaksakunul.
2 Nga ac fah kaksakunul ke ma nukewa El orala;
Lela tuh elos su pulakin keok in lohng ac in enganak!
3 Kom in wiyu fahkak pwengpeng lun LEUM GOD;
Ac lela kut in tukeni kaksakin Inel!
4 Ke nga pre nu sin LEUM GOD, El topukyu;
El aksukosokyeyu liki sangeng luk nukewa.
5 Mwet su keok elos nget nu sel ac enganak;
Elos ac fah tiana supwarla insialos.
6 Mwet munas elos pang nu sel, ac El topkolos.
El molelosla liki mwe ongoiya lalos nukewa.
7 Lipufan lun LEUM GOD karinganulos su akfulatyal
Ac molelosla liki mwe fosrnga nu selos.
8 Kom in sifacna akilenak lupan woiyen LEUM GOD.
Insewowo elos su konauk misla in El.1 Pet 2:3
9 Akfulatye LEUM GOD, kowos mwet lal;
Elos su aksol elos eis mwe enenu lalos nukewa.
10 Finne lion, elos ac masrinsral ke wangin mongo nalos,
A elos su akos LEUM GOD, ma wo elos enenu tia ku in wangin.
11 Fahsru, mwet fusr nutik, ac porongeyu,
Ac nga ac fah luti kowos in akfulatye LEUM GOD.
12 Ya kowos lungse engankin moul lowos?
Ya kowos lungse moul paht ac engan?34:12–16; 1 Pet 3:10–12
13 Na taran kowos liki kas fohkfok
Ac kas kikiap.
14 Forla liki ma koluk ac oru ma wo;
Sang insiowos nufon in suk moul misla.
15 Mutun LEUM GOD suiya mwet suwoswos,
Ac sracl porongo tung lalos.
16 A El lainulos su oru ma koluk,
Ke ma inge elos fin misa, ac sa na in mulkinyukla elos.
17 Ke mwet suwoswos elos pang nu sin LEUM GOD, El porongalos;
El molelosla liki ongoiya lalos nukewa.
18 LEUM GOD El apkuran nu selos su inse musalla,
Ac El molelos su wanginla finsrak la.
19 Mwet wo elos keok ke mwe ongoiya pus,
Tusruktu LEUM GOD El molelos liki ma inge nukewa.
20 LEUM GOD El arulana karinganulos;
Tia sokofanna sri kaclos fah kaptelik.Jn 19:36
21 Ma koluk fah uniya mwet koluk;
Elos su srunga mwet suwoswos ac fah kalyeiyuk.
22 LEUM GOD El ac fah molela mwet lal;
Elos su fahsr nu yorol in suk moul, fah karinginyuk.