119
Ma Sap Lun LEUM GOD
1 Insewowo elos su wangin mwatalos,
Su moul fal nu ke ma sap lun LEUM GOD.
2 Insewowo elos su fahsr ke ma sap lal,
Su aksol ke insialos nufon.
3 Elos tiana oru ma koluk;
A elos fahsr fal nu ke ma lungse lun LEUM GOD.
4 LEUM GOD, kom ase tari ma sap lom
Ac kom sapkin tuh kut in arulana akos.
5 Saok ngan ku in arulana oaru
In liyaung mwe luti lom!
6 Nga fin liyaung ma sap lom nukewa,
Na nga fah tia akmwekinyeyuk.
7 Ke nga lutlut ke nununku suwoswos lom
Nga fah kaksakin kom ke inse nasnas.
8 Nga fah akos ma sap lom;
Nikmet sisyula.
Akos Ma Sap Lun LEUM GOD
9 Sie mwet fusr ac liyaung fuka tuh in nasnas moul lal?
Pa inge: el fin akos ma sap lom.
10 Ke insiuk nufon nga srike in kulansupwekom;
Nik kom lela nga in seakos ma sap lom.
11 Nga likiya ma sap lom insiuk,
Tuh nga in tia orekma koluk lain kom.
12 Nga kaksakin kom, O LEUM GOD,
Lutiyu inkanek lom.
13 Nga fah kaskaskin
Ma sap nukewa ma kom oakiya.
14 Nga engan in fahsr ke ma sap lom
Liki na in eis mwe kasrup yohk.
15 Nga lutlut ke oakwuk lom;
Nga lohang nu ke mwe luti lom.
16 Nga insewowo ke ma sap lom,
Nga fah tiana mulkunla kas lom.
Insewowo Ke Ma Sap Lun LEUM GOD
17 Nga mwet kulansap lom, kom in kulang nu sik
Tuh nga fah ku in moul ac akos mwe luti lom.
18 Ikasla mutuk tuh nga fah ku in akilen
Wolana lun mwe luti pwaye lom.
19 Nga muta fin faclu ke kitin pacl na fototo;
Nikmet okanla ma sap lom likiyu.
20 Insiuk kena ma lulap
In liye nununku lom pacl e nukewa.
21 Kom kai mwet filang;
Elos su tia akos ma sap lom elos selngawiyuk.
22 Eisla kaskou ac aksruksruk lalos likiyu,
Tuh nga liyaung na ma sap lom.
23 Mwet leum elos tukeni ac pwapa koluk lainyu,
Tusruktu nga fah lutlut ke mwe luti lom.
24 Kas in luti lom akinsewowoyeyu
Ac oana mwet kasru nu sik.
Sulela In Akos Ma Sap Lun LEUM GOD
25 Nga putatla nu infohk uh ke kutangyukla nga,
Tukasyuyak, oana kom tuh wulela kac.
26 Nga fahkyuyak nu sum, ac kom topukyu;
Luti nu sik inkanek lom.
27 Kasreyu tuh nga in kalem ke ma sap lom,
Ac nga fah nunku yohk ke kas in luti wolana lom.
28 Insiuk munasla ke asor;
Akkeyeyu, oana kom tuh wulela kac.
29 Sruokyuwi liki inkanek tafongla;
Ke kulang lom, luti nu sik ke ma sap lom.
30 Nga sulela tuh nga in akosten;
Nga lohang nu ke nununku lom.
31 LEUM GOD nga liyaung na mwe luti lom,
Nikmet lela tuh nga in akmwekinyeyuk.
32 Nga arulana engan in akos ma sap lom,
Mweyen kom ac fah akyokye etauk luk.
Sie Pre Ke Etauk
33 O LEUM GOD, luti nu sik kalmen ma sap lom,
Na nga fah akos in pacl e nukewa.
34 Aketeya ma sap lom nu sik, ac nga fah akos;
Nga fah liyaung ke insiuk nufon.
35 Oru tuh nga in fahsr fal nu ke ma sap lom,
Tuh nga konauk insewowo kac.
36 Oru tuh nga in lungse akos ma sap lom
Yohk liki na tuh nga in kasrup.
37 Furokla mutuk liki ma lusrongten;
Liyeyume oana kom tuh wulela kac.
38 Nga mwet kulansap lom, akfalye wulela lom nu sik,
In oana wulela su kom oru nu selos su akos kom.
39 Moliyula liki kaskas kou su nga sangeng kac;
Fuka woiyen nununku lom!
40 Nga kena akos ma sap lom;
Ase moul sasu nu sik, tuh kom suwoswos.
Lulalfongi Ma Sap Lun LEUM GOD
41 LEUM GOD, akkalemye lupan lungse lom nu sik,
Ac moliyula oana kom wulela kac.
42 Na nga fah ku in topkolos su kaskas kou keik,
Mweyen nga lulalfongi ke kas lom.
43 Oru tuh nga in ku in kaskas pwaye pacl e nukewa,
Tuh finsrak luk oan in nununku lom.
44 Nga ac fah liyaung ma sap lom pacl e nukewa,
Nu tok ma pahtpat.
45 Nga fah muta in sukosok pwaye,
Mweyen nga srike in akos kas in luti lom.
46 Nga fah fahkak nu sin tokosra uh ma kom sapkin,
Ac nga fah tia akmwekinyeyuk.
47 Nga pulakin insewowo ke nga akos ma sap lom,
Mweyen nga arulana lungse kas lom.
48 Nga sunakin ac lungse ma sap lom,
Ac nga fah nunku yohk ke mwe luti lom.
Lulalfongi Ke Ma Sap Lun LEUM GOD
49 Esam wulela lom nu sik, mwet kulansap lom,
Tuh ma inge ase finsrak nu sik.
50 Finne in pacl in keok luk, nga akwoyeyuk
Mweyen wulela lom ase moul nu sik.
51 Mwet filang elos aksruksrukiyu pacl nukewa,
Tusruktu nga tiana fahsr liki ma sap lom.
52 Nga esam nununku lom in pacl oemeet,
Ac ma inge akwoyeyu, O LEUM GOD.
53 Ke nga liye mwet koluk ke elos lain ma sap lom,
Nga arulana kasrkusrak.
54 In pacl fototo luk fin faclu
Nga kinala on ke sap lom.
55 Ke fong uh nga esam kom, O LEUM GOD,
Ac nga nunku ke ma sap lom.
56 Nga pulakin insewowo
Ke nga akos ma sap lom.
Inse Pwaye Nu Ke Ma Sap Lun LEUM GOD
57 O LEUM GOD, kom na pa nga enenu,
Ac nga wulela tuh nga fah akos ma sap lom.
58 Nga siyuk sum ke insiuk nufon
Tuh kom in pakomutuk, in oana wulela lom.
59 Ke nga nunku ke ouiyen moul luk,
Nga wulela nga in sifil forla ac fahsr tukun mwe luti lom.
60 Nga sulaklak, ac tia tuptupan
In akos ma kom sapkin.
61 Mwet koluk elos filiya mwe kwasrip nu sik,
Tusruktu nga tiana mulkunla ma sap lom.
62 Ke infulwen fong nga tukakek
Ac kaksakin kom ke nununku suwoswos lom.
63 Nga mwet kawuk lun mwet nukewa su kulansupwekom,
Aok, elos nukewa su akos ma sap lom.
64 LEUM GOD, faclu sessesla ke lungkulang lom;
Lutiyu ke ma sap lom.
Saokiyen Ma Sap Lun LEUM GOD
65 LEUM GOD, kom oru wo nu sik, mwet kulansap lom,
Fal nu ke wulela lom.
66 Ase etauk ac lalmwetmet nu sik,
Tuh nga lulalfongi ke sap lom.
67 Meet liki kom tuh kaiyu, nga fahsr sayen ma sap lom,
A inge nga akos kas lom.
68 Kom arulana wo ac arulana kulang!
Lutiyu ke sap lom.
69 Mwet filang elos tuh fahk kas kikiap keik,
Tusruktu nga akos mwe luti lom ke insiuk nufon.
70 Wanginna kalem lun mwet inge,
A funu nga, nga insewowo ke ma sap lom.
71 Kaiyuk lom nu sik mwe akwoyeyu,
Mweyen ke sripa sac nga lutlut ke ma sap lom.
72 Ma sap su kom ase nu sik, yohk kalmac nu sik
Liki mani nukewa fin faclu.
Ma Sap Lun LEUM GOD Arulana Suwohs
73 Kom oreyula ac karinginyu;
Ase etauk nu sik tuh nga fah luti ma sap lom.
74 Elos su akfulatye kom elos ac engan ke elos liyeyu,
Mweyen nga lulalfongi ke wulela lom.
75 LEUM GOD, nga etu tuh nununku lom suwohs,
Ac kom kaiyu mweyen kom inse pwaye.
76 Lela lungse kawil lom in akwoyeyu,
Oana kom tuh wulela nu sik, mwet kulansap lom.
77 Pakomutuk, ac nga fah moul,
Tuh nga insewowo ke ma sap lom.
78 Lela mwet filang in mwekin lah elos akkolukyeyu ke kikiap;
A funu nga, nga fah arulana nunku ke kas in luti lom.
79 Lela tuh elos su akfulatye kom in tuku nu yuruk —
Elos nukewa su etu ke ma sap lom.
80 Lela nga in akos na pwaye ma sap lom
Tuh nga fah tia akmwekinyeyuk.
Sie Pre Ke Molela
81 LEUM GOD, nga totola in soano molela lom nu sik;
Nga filiya lulalfongi luk ke kas lom.
82 Mutuk totola in tupan ma kom tuh wulela kac,
Ac nga fahk, “Kom ac kasreyu ngac?”
83 Nga oana sie pak in neinyuk wain ma sisila ac wanginla sripa,
Tusruktu nga tiana mulkunla ma sap lom.
84 Nga ac soano putaka?
Kom ac kai mwet su akkeokyeyu ngac?
85 Mwet filang su tia akos ma sap lom,
Elos pukanak luf in sruokyuwi.
86 Ma sap lom nukewa fal in lulalfongiyuk;
Mwet elos akkeokyeyu ke kas kikiap — kasreyu!
87 Elos apkuranna in uniyuwi,
Tusruk nga tiana pilesrala ma sap lom.
88 Ke lungse kawil lom, oru wo nu sik,
Tuh nga fah akos ma sap lom.
Lulalfongi Ke Ma Sap Lun LEUM GOD
89 Kas lom, O LEUM GOD, oan ma pahtpat,
Aok, oan ma pahtpat inkusrao.
90 Oaru lom oanna ke fwil nukewa;
Kom tuh oakiya faclu, ac faclu srakna oan.
91 Ma nukewa oanna nwe misenge ke sripen sap lom,
Ac ma nukewa kulansapwekom.
92 Ma sap lom funu tia ase insewowo nu sik,
Nga lukun misa tari ke mwe keok nu sik.
93 Nga fah tiana pilesru kas in luti lom;
Tuh ke ma inge kom moliyula.
94 Nga ma lom — moliyula!
Nga srike na in akos ma sap lom.
95 Mwet koluk elos soano in uniyuwi,
Tusruktu nga fah arulana nunku ke ma sap lom.
96 Nga etu tari lah oasr saflaiyen ma nukewa;
Tusruktu ma sap lom wangin saflaiya.
Lungse Ma Sap Lun LEUM GOD
97 Arulana yohk lungse luk ke ma sap lom!
Nga nunku kac ke len nufon.
98 Ma sap lom wiyu pacl e nukewa
Ac oru nga lalmwetmet liki mwet lokoalok luk.
99 Nga kalem kac yohk liki mwet luti luk nukewa,
Mweyen nga arulana nunku ke kas in luti lom.
100 Yohk lalmwetmet luk liki mwet matu,
Mweyen nga akos ma sap lom.
101 Nga taranyu liki orekma koluk nukewa,
Mweyen nga lungse akos kas lom.
102 Nga tiana pilesrala kas in luti lom,
Mweyen kom na pa lutiyu.
103 Kas in luti lom arulana emwem,
Aok, emwem liki na honey nu ke oalik!
104 Nga eis lalmwetmet ke ma sap lom,
Ke ma inge nga srunga inkanek koluk nukewa.
Kalem Su Tuku Ke Ma Sap Lun LEUM GOD
105 Kas lom lam nu ke niuk
Ac kalem nu ke inkanek luk.
106 Nga orala sie wulela na ku
Tuh nga in akos kas in luti suwoswos lom.
107 LEUM GOD, pwayena lah mwe keok luk arulana upa;
Sruokya moul luk, oana ke kom wulela.
108 Eis pre in sang kulo luk, O LEUM GOD,
Ac lutiyu ke ma sap lom.
109 Nga akola pacl nukewa in pilesrala moul luk,
Tuh nga tiana mulkunla ma sap lom.
110 Mwet koluk elos filiya mwe kwasrip nu sik,
Tuh nga tiana pilesrala ma sap lom.
111 Ma sap lom mwe usru luk nwe tok,
Aok, mwe engan lun insiuk.
112 Nga sulela tari tuh nga in akos ma sap lom
Nwe ke na nga misa.
Langoeyukla Ke Ma Sap Lun LEUM GOD
113 Nga srungalos su tia inse pwaye nu sum,
A nga lungse ma sap lom.
114 Kom nien wikla luk ac lango luk;
Nga filiya finsrak luk in wuleang lom.
115 Mwet koluk, kowos fahla likiyu.
Nga ac fah akos ma sap lun God luk.
116 Akkeyeyu, oana kom wulela, ac nga fah moul;
Nikmet lela tuh nga in toasrla ke sripen tia sun mwe finsrak luk!
117 Sruokyuwi tuh nga fah tu na ku,
Ac nga fah lohang nu ke ma sap lom pacl e nukewa.
118 Kom ngetla liki mwet nukewa su seakos ma sap lom;
Pwapa kutasrik lalos wangin sripa.
119 Kom oru mwet koluk nukewa oana kutkut,
Ke ma inge nga lungse kas in luti lom.
120 Ke sripom nga sangeng;
Nga arulana sangeng ke sripen nununku lom.
Akos Ma Sap Lun LEUM GOD
121 Nga oru ma suwohs ac pwaye;
Nikmet filiyula nu inpoun mwet lokoalok luk.
122 Wulela nu sik lah kom ac kasru mwet kulansap lom;
Nikmet lela mwet inse fulat in akkeokyeyu.
123 Mutuk totola in soano molela lom nu sik
Su kom tuh wulela kac.
124 Oru nu sik fal nu ke lungse kawil lom,
Ac luti nu sik sap ku lom.
125 Nga mwet kulansap lom; ase etauk nu sik
Tuh nga fah etu kas in luti lom.
126 LEUM GOD, pacl fal kom in kai mwet uh,
Mweyen elos seakos ma sap lom.
127 Nga lungse ma sap lom yohk liki gold,
Yohk liki gold ma arulana nasnas.
128 Ke ma inge nga fahsr ke inkanek in luti lom nukewa;
Ac nga srunga inkanek sutuu nukewa.
Kena Akos Ma Sap Lun LEUM GOD
129 Kas in luti lom wolana;
Nga akos ke insiuk nufon.
130 Aketeyen mwe luti lom ase kalem,
Ac sang etauk nu sin mwet nikin.
131 In kena luk nu ke sap ku lom
Nga mangelik na ke malak luk.
132 Forma nu sik ac pakomutuk,
Oana kom oru nu selos nukewa su lungse kom.
133 Sruokyuwi nga in tia ikori, fal nu ke wulela lom,
Ac tia lela tuh ma koluk in kutangyula.
134 Moliyula liki mwet su akkeokyeyu,
Tuh nga fah akos sap lom.
135 Kom in akinsewowoyeyu ke kalem lun motom,
Ac lutiyu ke oakwuk lom.
136 Sroninmutuk sororla oana soko infacl
Mweyen mwet uh elos tia akos ma sap lom.
Suwoswosiyen Ma Sap Lun LEUM GOD
137 LEUM GOD, kom suwoswos,
Ac ma sap lom suwosna.
138 Oakwuk ma kom ase tari
Arulana fal ac suwohs.
139 Kasrkusrak luk tayak in nga oana sie e,
Mweyen mwet lokoalok luk elos tia akilen ma sap lom.
140 Wulela lom pwayena!
Nga arulana lungse!
141 Nga mwet lusrongten, ac kwaseyuk nga,
Tusruktu nga tia pilesru kas in luti lom.
142 Suwoswos lom ac fah oan ma pahtpat,
Ac ma sap lom pwaye pacl e nukewa.
143 Nga arulana keok ac fosrnga,
Tusruktu ma sap lom akinsewowoyeyu.
144 Kas in luti lom suwosna in pacl e nukewa;
Ase nu sik etauk ac nga fah moul.
Sie Pre Ke Molela
145 Nga pang nu sum ke insiuk nufon.
Topukyu, O LEUM GOD, ac nga fah akos ma sap lom.
146 Nga pang nu sum,
Moliyula, ac nga fah liyaung ma sap lom.
147 Meet liki lenelik nga pang nu sum in kasreyu;
Nga filiya finsrak luk in wulela lom.
148 In fong nufon se nga oanna ngetnget,
Ac nunku yohk ke kas in luti lom.
149 Lohngyu, O LEUM GOD, ke sripen lungse lom kawil;
Pakomutuk ac moliyula.
150 Mwet su akkeokyeyu elos apkuranme,
Aok, elos su tiana karinganang ma sap lom.
151 Tusruk kom apkuran nu yuruk, LEUM GOD,
Ac ma sap lom nukewa oanna nwe tok.
152 In pacl loeloes somla nga lutlut ke mwe luti lom,
Tuh kom oakiya in oan ma pahtpat.
Kusen Kwafe In Suk Kasru
153 Liye keok luk, ac moliyula,
Mweyen nga tiana pilesru ma sap lom.
154 Loangeyu ac aksukosokyeyu;
Moliyula, oana kom tuh wulela.
155 Mwet koluk ac fah tia moliyukla,
Mweyen elos tia akos ma sap lom.
156 A pakoten lom yoklana, LEUM GOD.
Akkalemye pakoten lom ac moliyula.
157 Pus mwet lokoalok luk ac mwet kalyeiyu,
Tusruktu nga tiana mulkunla in akos ma sap lom.
158 Ke nga liye mwet kutasrik inge, nga arulana toasr selos,
Mweyen elos tia liyaung sap lom.
159 LEUM GOD, liye lupan lungse luk nu ke kas in luti lom.
Lungse lom uh tiana ekyek, ke ma inge moliyula!
160 Kas nukewa in ma sap lom arulana pwaye,
Ac nununku suwoswos nukewa lom oan ma pahtpat.
Nunak Pwaye Nu Ke Ma Sap Lun LEUM GOD
161 Mwet leum elos kalyeiyu ke wangin mwetik,
Tusruktu nga akfulatye ma sap lom.
162 Nga arulana engan ke wuleang lom
Oana sie mwet su konauk mwe kasrup yohk lal.
163 Nga srunga ac kwase ma kikiap nukewa,
A nga lungse ma sap lom.
164 Pacl itkosr in len se nga fahkak kulo luk nu sum,
Ke sripen nununku suwohs lom.
165 Elos su lungse ma sap lom elos muta in misla wo,
Ac wangin kutena ma ac fah aktukulkulyelos.
166 LEUM GOD, nga soano kom in moliyula,
Ac nga oru ma kom sapkin.
167 Nga akos kas in luti lom,
Ac lungse ma inge ke insiuk nufon.
168 Nga akos ma sap lom ac mwe luti lom;
Kom liye ma nukewa nga oru.
Sie Pre In Suk Kasru
169 Lela pusren pang luk nu sum in sun kom, LEUM GOD!
Ase etauk nu sik, oana kom tuh wulela.
170 Porongo pre luk,
Ac moliyula, fal nu ke wulela lom!
171 Nga fah kaksakin kom pacl e nukewa,
Mweyen kom lutiyu ke ma sap lom.
172 Nga fah onkakin ma sap lom,
Mweyen ma sap lom suwohs.
173 Akola pacl nukewa in kasreyu,
Tuh nga sulela in fahsr tukun ma sap lom.
174 O LEUM GOD, nga kena eis kasru sum in moliyula.
Nga konauk engan in ma sap lom.
175 Lela nga in moul, tuh nga fah ku in kaksakin kom;
Lela tuh mwe luti lom in kasreyu.
176 Nga nikinyula in fufahsryesr luk oana soko sheep tuhlac;
Ke ma inge fahsru ac sukyu, mwet kulansap lom,
Mweyen nga tiana pilesru ma sap lom.