118
Sie Pre In Sang Kulo Ke Sripen Kutangla
1 Sang kulo nu sin LEUM GOD, tuh El wo,
Ac lungkulang lal oan ma pahtpat. 1 Chr 16:34; 2 Chr 5:13; 7:3; Ezr 3:11; Psa 100:5; 106:1; 107:1; 136:1; Jer 33:11
2 Lela mwet Israel in fahk,
“Lungkulang lal oan ma pahtpat.”
3 Lela mwet tol lun God in fahk,
“Lungkulang lal oan ma pahtpat.”
4 Lela elos nukewa su alu nu sel in fahk,
“Lungkulang lal oan ma pahtpat.”
5 In ongoiya luk nga pang nu sin LEUM GOD.
El topukyu ac aksukosokyeyula.
6 LEUM GOD El wiyu, nga fah tia sangeng;
Mea mwet uh ku in oru nu sik? Heb 13:6
7 LEUM GOD pa kasreyu,
Ac nga fah liye ke mwet lokoalok luk kutangyukla.
8 Wo in lulalfongi LEUM GOD
Liki in lulalfongi mwet uh.
9 Wo in lulalfongi LEUM GOD
Liki in lulalfongi mwet kol faclu.
10 Mwet lokoalok pus rauniyula,
Tusruktu nga kunauselosla ke ku lun LEUM GOD!
11 Elos apinyula ke siska nukewa,
Tusruktu nga kunauselosla ke ku lun LEUM GOD!
12 Elos rirme apinyula oana bee uh,
Tusruktu elos firiryak ac sa na wanginla, oana firirla lun mah pao;
Nga kunauselosla ke ku lun LEUM GOD.
13 Elos mweuniyu arulana upa, ac nga apkuran in kutangyukla,
Tusruktu, LEUM GOD El kasreyu.
14 LEUM GOD El oru tuh nga in ku ac fokoko;
El moliyula. Exo 15:2; Isa 12:2
15 Porongo pusren sasa in engan ke kutangla in lohm nuknuk sin mwet lun God,
“Ku lulap lun LEUM GOD pa oru ma inge!
16 Ku lal pa ase kutangla nu sesr,
Aok ku lal in pacl in mweun.”
17 Nga fah tia misa, a nga ac moul
Ac fahkak ke ma LEUM GOD El oru.
18 El arulana kaiyu upa,
Tusruktu El tiana lela nga in misa.
19 Ikasla mutunpot lun Tempul nu sik.
Nga ac fah utyak ac sang kulo nu sin LEUM GOD!
20 Pa inge mutunpot lun LEUM GOD;
Mwet suwoswos mukena ku in utyak we.
21 Nga kaksakin kom, LEUM GOD, tuh kom lohngyu,
Ac ase kutangla nu sik.
22 Eot se su mwet musa elos sisla,
Sikyak tuh pa inge eot se ma yohk sripa oemeet. Lk 20:17; Orek 4:11; 1 Pet 2:7 118:22–23; Mt 21:42; Mk 12:10–11
23 Ma inge ma LEUM GOD El oru;
Fuka lupan woiya ke kut liye!
24 Pa inge len se su LEUM GOD El orala;
Lela kut in engan ac akfulatye!
25 Molikutla, LEUM GOD, molikutla!
Ase wo ouiya nu sesr, LEUM GOD! Mt 21:9; Mk 11:9; Jn 12:13
26 Lela God Elan akinsewowoye el su tuku ke Inen LEUM GOD!
Liki Tempul lun LEUM GOD kut akinsewowoye kom. Mt 21:9; 23:39; Mk 11:9; Lk 13:35; 19:38; Jn 12:13
27 Tuh LEUM GOD El God, El ase kalem nu sesr.
Ke lesak inpouwos kowos in mutawauk pacl in akfulat
Ac fahsr rauni loang uh.
28 Kom God luk, ac nga sot kulo nu sum;
Nga fah fahkak fulat lom.
29 Sang kulo nu sin LEUM GOD, tuh El wo
Ac lungkulang lal oan ma pahtpat.