2
Nia mee huogodoo ala i di gili di langi i nua mo i henuailala nei guu lawa huogodoo. Togo hidu laangi gei God ne haga lawa ana mee huogodoo ala nogo hai, gaa noho e hagamolooloo.* Hebrews 4.4,10 Mee ga hagadabu togo hidu laangi gaa dugu gee bolo di laangi dabuaahia, idimaa, di laangi deelaa di laangi ne haga lawa ai ana mee ala nogo hai huogodoo, ga hagamolooloo.* Exodus 20.11
Deelaa di hai ne hai ai nia mee huogodoo ala i di langi i nua mo i henuailala.
Di hadagee Eden
Di madagoaa Yihowah-God* Di ingoo o God deenei le e hai dono hadinga bolo “Yihowah go di God dela e noho i baahi ana daangada” ne hai nia mee ala i di langi i nua mo henuailala, gei di maa nogo deai nia laagau tomo i henuailala ai, ge deai nia lii ne matilitili ai, idimaa, Yihowah-God digi haga doo dana uwa, ge deai tangada e haala be e haga maluu di gelegele ai. Gei nia wai le e uwa aga hua i lodo tenua ga haga tiu di gelegele.
Gei Yihowah-God gaa kae ana gelegele i di gelegele o tenua, ga haga noho dana dangada. Mee ga ili ana madangi mouli gi nia madauhi o maa, gei tangada deelaa ga daamada ga mouli.* 1-Corinthians 15.45
Gei Yihowah-God gaa dogi dana hadagee i Eden, i di bahi i dua, gaa dugu dana daane dela ne hai gii noho i di gowaa deelaa. Mee gaa hai nia hagadilinga laagau madamada huoloo gii tomo i golo, gii huwa i nia huwa laagau humalia. Ge tungaalodo di hadagee deelaa, le e duu ai di laagau dela e iai di mouli mo di laagau dela e hai gi iloo ai di humalia mo di huaidu.* Revelation 2.7; 22.2,14
10 Di monowai e hali i lodo Eden e haga magalillili di hadagee deelaa, gei tua o Eden la guu wwae haa guu hai nia monowai e haa. 11 Di monowai matagidagi la go Pishon, e hali di gili tenua go Havilah. 12 Nia goolo e kida i tenua deelaa, mono daubigi laagau ala e hai nia lolo kala, mono hadu ‘onyx’ dingidingia hagalabagau. 13 Di lua monowai la go Gihon, e hali di gili tenua o Cush. 14 Tolu monowai la go Tigris, dela e hali i bahi i dua o Assyria, ge di haa monowai la go di Euphrates.
15 Gei Yihowah-God gaa dugu tangada gi lodo di hadagee go Eden e haga maluu di maa ge e hagaloohi di maa. 16 Mee ga helekai gi mee, “Goe e mee di gai nia huwa laagau huogodoo i lodo di hadagee, 17 gei goe hudee geina nia huwa o di laagau dela e hai tangada gi iloo di humalia mo di huaidu. Maa goe gaa gai di maa, gei goe gaa made hua i di laangi deelaa.”
18 Yihowah-God ga helekai, “Ma hagalee humalia gi taane ma gaa noho modogoia. Au gaa hai dagu dangada e hoo a mee, e hagamaamaa a mee.” 19 Gei Mee ga dahi aga ana gelegele i hongo di gelegele tenua, gaa hai ana manu dolodolo huogodoo mono manu mamaangi ga laha mai digaula gi tangada gii mmada a mee e gahi ono ingoo, ge deelaa di hai o nia manu ne gahi nadau ingoo. 20 Gei tangada gaa gahi nia ingoo nia manu mamaangi huogodoo mono manu dolodolo huogodoo, gei di maa deai di manu i lodo digaula e humalia di hagamaamaa a mee ai.
21 Gei Yihowah-God gaa hai tangada la gii kii danu mmoe gaa daa dana iwi i di wogowogo o maa, ga hagabuni di lohongo di maa. 22 Gei Mee gaa hai dana ahina gi di iwi wogowogo, ga laha mai a Mee gi taane. 23 Gei taane ga helekai,
“Deenei la go dogu hagadilinga.
Di iwi ne daa i ogu iwi,
ge nia goneiga ne daa i ogu goneiga.
Di ingoo o maa go ‘di ahina’,
idimaa mee ne daa mai i taane.” I nnelekai Hebrew di ingoo di ahina mo di ingoo taane le e hai dono lee be di mee e dahi
24 Deelaa di mee a taane gaa tanga gi daha mo dono damana mo dono dinana, ga buni anga hua gi dono lodo, meemaa dogolua gu hai hua di mee e dahi.* Matthew 19.5; Mark 10.7-8; 1-Corinthians 6.16; Ephesians 5.31
25 Taane mo di ahina nau goloo i nau gili ai, ge meemaa hagalee langaadia i ginaua.

*2.2: Hebrews 4.4,10

*2.3: Exodus 20.11

*2.4: Di ingoo o God deenei le e hai dono hadinga bolo “Yihowah go di God dela e noho i baahi ana daangada”

*2.7: 1-Corinthians 15.45

*2.9: Revelation 2.7; 22.2,14

2.23: I nnelekai Hebrew di ingoo di ahina mo di ingoo taane le e hai dono lee be di mee e dahi

*2.24: Matthew 19.5; Mark 10.7-8; 1-Corinthians 6.16; Ephesians 5.31