NEMPE KAN
Oaralap en Pwuhk wet
Pwuhken Nempe kan koasoia duwen poadopoad en mehn Israel kan erein sounpar 40, sang ahnsou me re mweselsang nin Nahna Sainai lel ni ahnsou me re lel ni irepen palimesehn sahpw me Koht ketin inoukihong irail. Eden pwuhk wet kohsang ni irair kesempwal ehu me wiawi rehrail, iei: wadawad en mehn Israel ko nin Nahna Sainai mwohn ar mweselsang wasao, oh pil ehu wadawad me wiawi nan Mohap, ni palimesehn Pillap Sordan, sounpar rieisek samwa mwuri. Nanpwungen wadawad riau wet, mehn Israel ko ahpw patohla Kades Parnea ni irepen palieir en Kenan; a ni ar sohte pedolong nan sapwen inowo sang wasao, re mihmihki wasao sounpar tohto. Eri, mwurin met re ahpw mweselsang Kades oh kohla nan sahpw me mi ni palimesehn Pillap Sordan. Eri, ekei irail ahpw kousoanla wasao, a luhwe ko kaunopada pwe re en kotehla Sordan kolahng Kenan.
Pwuhken Nempe kan iei koasoiepen aramas ekei me pak tohto kin sohla ar koapworopwor oh nan kapehd tikitikla pwehki apwal akan, aramas me kin pelian Koht oh Moses, oh ohl me Koht ketin kilelehdi en kahluwa irail. Pwuhk wet koasoia duwen en Koht eh ketin loalopwoat oh ketin apwahpwalihete sapwellime aramas akan, mehnda ma re me luwet oh sapeik. Pwuhk wet pil koasoia duwen en Moses eh kanengamah ekei ahnsou.
Audepe ni Oaralap
Mehn Israel kan onopada re en mweselsang Nahna Sainai 1.1— 9.23
a. Keieun wadawad en aramas 1.1—4.49
b. Soangen kosonned oh koasoandi kan 5.1—8.26
c. Keriaun Pahsohpa 9.1-23
Sang Nahna Sainai lel Mohap 10.1—21.35
Mwekid kan nan Mohap 22.1—32.42
Oaralap en ar seiloaksang Isip lel Mohap 33.1-49
Kaweid kan mwohn ar pahn kotehla Pillap Sordan 33.50—36.13
1
Keieun Wadawad en mehn Israel kan
KAUN-O ketin mahseniong Moses nan Impwal me e kin ketiket loaleo, nan Sapwtehn Sainai, ni keieun rahnen sounpwong keriau ni sounpar keriau mwurin mehn Israel ko ar mweselsang Isip, e mahsanih, “Kowe oh Aaron pahn wia wadawad en aramas en Israel kan koaros nin duwen ar peneinei kan. Kumwa eri ntingihedi eden ohl koaros me mahkier sounpar rieisek kohda me kak wia sounpei. Emen kaunen peneinei kan sang ni kadaudok koaros en sewesei kumwa. 5-16 Eri iet mwaren irail kan, kaunen kadaudok kan, me pilipildahr pwehn wia doadoahk wet:
 
KadaudokKaunen peneinei
ReupenElisur, nein Sedeur
SimionSelumiel, nein Surisadai
SudaNahson, nein Aminadap
IsakarNedanel, nein Suar
SepulonEliap, nein Elon
EpraimElisama, nein Ammihud
ManaseKamaliel, nein Pedasur
PensaminApidan, nein Kideoni
DanAhieser, nein Amisadai
AserPakiel, nein Okaran
KadEliasap, nein Deuel
NapdaliAira, nein Enan
 
17 Ohl ehk riemen pwukat sewesehda Moses oh Aaron 18 kapokonepene mehn Israel koaros ni rahn keieu en keriaun sounpwong oh ntingihedi aramas koaros ni wadawad en peneinei. Mwaren ohl koaros sang sounpar rieisek kohda ntingdi oh wadawadedi, 19 nin duwen KAUN-O eh ketin mahsanih. Moses ntingihedi mwaren aramas akan nan Sapwtehn Sainai. 20-46 Ohl koaros me mahkier sounpar rieisek kohda me kak wia sounpei, kileldier nin duwen peneinei, tepisang kadaudok en Reupen nein Seikop mesenih. Koaruhsie patpene iet duwe:
 
KadaudokUwen tohto
Reupen46,500
Simion59,300
Kad45,650
Suda74,600
Isakaer54,400
Sepulon57,400
Epraim40,500
Manase32,200
Pensamin35,400
Dan62,700
Aser 41,500
Napdali 53,400
Patpene koaros: 603,550
 
47 Mehn Lipai ko sohte iang patehng kileledi en mehn Israel teiko, 48 pwehki KAUN-O eh mahsanihong Moses, 49 “Ni omw pahn wia wadawad en aramas akan me kak wia sounpei, ke dehpa iangahki kadaudok en Lipai. 50 Ahpw, kumwa pahn kihong mehn Lipai kan en pwukoahki apwahpwalih Impwal me I pahn kin ketiket loale iangahki dipwisou kan me mi loale. Re pahn kin wa iangahki dipwisawi kan, pil papah loale, oh kauwada imwarail impwal kan kapilkipene. 51 Ahnsou koaros me kumwail pahn kin mwekidida, mehn Lipai kan pahn kin kamwerehdi Impwalo oh pahn kin pwurehng kauwada wasa kapw kis me kumwail pahn kin uhdi ie. Mehmen me kaidehn mehn Lipai me pahn keidohng mpen Impwalo pahn kamakamala. 52 Mehn Israel teikan pahn kin kauwada imwarail impwal ni koasoandien pwihn kei, emenemen aramas pahn iang eh pwihn pahn arail pilaik. 53 Ahpw mehn Lipai kan pahn kauwada imwarail impwal kan kapilkipene Impwalo pwe re en sinsile, pwe emen en dehr kerendohng oh kahrehda ei engieng eh pahn lelohng mehn Israel koaros.” 54 Mehn Israel ko eri kapwaiada mehkoaros me KAUN-O mahsanihong Moses. Nempe 26.1-51.

1:54: Nempe 26.1-51.