JEREMIAH
Tukakinyen Book in JEREMIAH
Mwet palu Jeremiah el moul inmasrlon yac 625 nu ke 585 meet liki Christ. Lusenna pacl el sie mwet palu, el sensenkakin mwet lun God ke ongoiya lulap ma ac putatyang nu fin mutunfacl Judah ke sripen elos alu nu ke ma sruloala ac oru ma koluk. El moul na nwe ke el sifacna liye kas in palu lal akpwayeiyuk: ke acn Jerusalem, wi Tempul, kunausyukla sel Nebuchadnezzar, tokosra Babylonia, ac oayapa ke tokosra lun Judah ac un mwet puspis utukla nu in sruoh in acn Babylonia. El oayapa palye ke sie pacl ma mwet Judah ac fah foloko liki sruoh ac sifil musaeak mutunfacl selos.
Book in Jeremiah ku in kitakatelik nu ke ip inge: (1) Pang nu sel Jeremiah. (2) Kas sin God me nu sin mutanfahl Judah ac nu sin tokosra inge lun acn we: Josiah, Jehoiakin, Jechoiachin, ac Zedekiah. (3) Kas ma Baruch, mwet sim lal Jeremiah, el simusla ke kutu ma yohk sikyak in moul lal Jeremiah wi kas in palu lal. (4) Kas lun Leum God ke mutunfacl saya. (5) Sramsram ke musalla lun acn Jerusalem, ac ke sruoh nu Babylonia.
Jeremiah el sie mwet na yohk lungse la, ac el arulana pakomuta mwet lal, pwanang el tia lungse akkalemye nu selos lah God El ac akkeokyalos. In ma simusla puspis el srumun lupan keok lal ke sripen God El pangnol tuh elan sie mwet palu. Kas lun Leum God oana sie e firir insial — su el tia ku in sikulya in tia fahkak.
Kutu kas ma yohk in book se inge fahk ke ma ac sikyak tukun pacl lal Jeremiah — nu ke sie len ac mau oasr sie wuleang sasu, su mwet lun God fah karingin finne wangin mwet luti in akesmakyalos, mweyen ac fah simla insialos (Jeremiah 31:31–34).
Takla Lun Koanon Book Se Inge
Pang nu sel Jeremiah 1:1–19
Kas in palu ke pacl lal Tokosra Josiah, Jehoiakim, Jehoiachin, ac Zedekiah 2:1—25:38
Ma sikyak in moul lal Jeremiah 26:145:5
Kas in palu lain mutunfacl puspis 46:1—51:64
Musalla lun Jerusalem 52:1–34
1
Book se inge fahkak ke kas lal Jeremiah wen natul Hilkiah, sie sin mwet tol lun siti srisrik Anathoth ke facl lun Benjamin. LEUM GOD El kaskas nu sel Jeremiah in yac se aksingoul tolu ma Josiah wen natul Amon el tuh tokosra lun Judah, 2 Tok 22:3—23:27; 2 Chr 34:8—35:19 ac El sifilpa kaskas nu sel Jeremiah ke Jehoiakin wen natul Josiah el tuh tokosra. Tukun pacl sac, LEUM GOD El kaskas nu sel ke pacl na pus, nwe ke yac aksingoul sie ma Zedekiah, wen natul Josiah, el tokosra. Ke malem se aklimekosr in yac sac mwet Jerusalem elos utukla nu in sruoh. 2 Tok 23:36—24:7; 2 Chr 36:5–8; 2 Tok 24:18—25:21; 2 Chr 36:11–21
Pang nu sel Jeremiah
LEUM GOD El fahk nu sik, “Meet liki nga lumwekomla nga sulekomla, ac meet liki kom isusla nga srikomla in sie mwet palu nu sin mutunfacl uh.”
Na nga topuk, “LEUM GOD Fulatlana, nga nikin lah mea nga ac fahk. Nga arulana fusrla.”
Tusruktu LEUM GOD El fahk nu sik, “Nikmet fahk mu kom fusrla, a fahla nu yurin mwet ma nga supwekom nu se uh, ac fahk nu selos ma nukewa nga sapkin kom in fahk. Nimet sangeng selos, tuh nga ac fah wi kom ac karingin kom. Nga, LEUM GOD, pa fahk ma inge!”
Na LEUM GOD El asroema paol, pusralla ngoasrok, ac fahk nu sik, “Porongo, nga ac sot nu sum kas kom in fahk. 10 Misenge nga sot ku nu sum fin mutunfacl ac tokosrai nukewa, in fusak ac in ikorinya, in kunausla ac sisla, in musai ac in yukwiya.”
Aruruma Luo
11  LEUM GOD El siyuk sik, “Jeremiah, mea kom liye?”
Nga topuk, “Nga liye lesak almond se.”
12  LEUM GOD El fahk, “Pwaye sum, ac nga tawi* tawi: fahkyen ‘tawi’ ac ‘almond’ apkuran oana sie in kas Hebrew. in liye lah kas luk akpwayeiyuk.”
13 Na LEUM GOD El sifil kaskas nu sik, ac siyuk, “Mea pac kom liye?”
Nga topuk, “Nga liye pac tup in kof se poel epang, ac apkuran in topme nu layenu.”
14 El fahk nu sik, “Mwe ongoiya ac fah kahkma epangme nu faclos nukewa su muta in facl se inge, 15 mweyen nga pangon mutunfacl nukewa in acn epang in tuku. Tokosra lalos fah oakiya tron lalos ke mutunpot lun Jerusalem ac rauneak pot we, ac oayapa rauneak siti saya lun Judah. 16 Nga fah kalyei mwet luk mweyen elos orekma koluk. Elos fahsr likiyu, sang mwe kisa lalos nu sin god ngia, ac orek ma sruloala ac alu nu selos. 17 Jeremiah, akola kom in som ac fahk nu selos ma nukewa nga sapkin kom in fahk. Nikmet sangeng selos inge. Kom fin sangeng nga fah akyokye sangeng lom ke kom ac tu ye mutalos. 18 Misenge nga oru tuh kom in oana sie siti potiyukyak kulana, soko sru osra, sie kalkal bronze, ma in lain facl se inge nufon — lain tokosra nukewa lun Judah, wi fisrak we, mwet tol we, ac mwet in facl sac. 19 Elos fah mweun lain kom; tusruktu elos ac fah tia ku in kutangkomla, tuh nga ac fah wi kom ac karingin kom. Nga, LEUM GOD, pa fahk ma inge.”

1:2 2 Tok 22:323:27; 2 Chr 34:835:19

1:3 2 Tok 23:3624:7; 2 Chr 36:5–8; 2 Tok 24:1825:21; 2 Chr 36:11–21

*1:12 tawi: fahkyen ‘tawi’ ac ‘almond’ apkuran oana sie in kas Hebrew.