ZECHARIAH
Tukakinyen Book Lal ZECHARIAH
Book lal Zechariah oasr ip yohk luo kac: (1) Chapter 1–8 Kas in palu sel mwet palu Zechariah, ma simla inmasrlon yac 520 nu ke 518 B. C. meet liki Christ. Ma simla inge srumun yokna ke aruruma, ac ke folokyak lun Jerusalem, ke sifilpa musaiyuk lun Tempul, ke aknasnasyeyuk mwet lun God, ac ke tuku lun Messiah. (2) Chapter 9–14 Orekeni ma fwackyak ke tawiyen Messiah ac ke nununku safla.
Takla Lun Koanon Book Se Inge
Mwe sensenkakin ac mwe finsrak 1:1—8:23
Nununku nu sin mutunfacl atulani Israel 9:1–8
Kapkapak ac misla nu ke pacl fahsru 9:9—14:21
1
LEUM GOD El Pangon Mwet Lal In Foloko Nu Yorol
In malem se akoalkosr ke yac se akluo in pacl Darius el Tokosra Fulat lun Persia, LEUM GOD El sang kas inge nu sel mwet palu Zechariah, su wen natul Berechiah, su ma natul Iddo. Ezr 4:24—5:1; 6:14 LEUM GOD Kulana El fahkang nu sel Zechariah in fahk nu sin mwet uh, “Nga, LEUM GOD, tuh arulana kasrkusrak sin mwet matu lowos, tusruktu inge nga fahk nu suwos, ‘Kowos foloko nu yuruk, ac nga fah folokot nu yuruwos. Nimet kowos oana mwet matu lowos. In pacl loes somla, mwet palu elos tuh fahkak kas luk nu selos, ac fahk mu elos in tia sifil moulkin moul koluk, ac tia sifil oru ma koluk.’ A elos tiana porongeyu ku akosyu. Mwet matu lowos ac mwet palu ingo elos wanginla. Nga tuh sang sap luk nu sin mwet kulansap luk, mwet palu, kas in akesmakyalos, tusruktu elos tiana lohang nu kac, oru elos tuh keokkin seakos lalos. Na elos auliyak ac fahkak lah elos akilen lah nga, LEUM GOD Kulana, tuh kalyaelos fal nu ke ouiyalos, oana ke nga sulela in oru.”
Aruruma Lun Mwet Palu Ke Horse Uh
In yac se akluo lal Tokosra Fulat Darius, ke len aklongoul akosr in malem se aksingoul sie (malem in Shebat), LEUM GOD El ikasla nu sik sie mwe fahkak in sie aruruma ke fong. Nga tuh liye mwet se kasrusr fin soko horse srusra. El tui inmasrlon sak myrtle infahlfal se, ac oasr pac kutu horse tokol — kutu srusra, kutu tuhntun, ac kutu fasrfasr. Fwack 6:4; Fwack 6:2 Na nga siyuk sel, “Leum se, mea kalmen horse ingan?”
Na lipufan se ma kaskas nu sik ah topuk ac fahk, “Nga fah akkalemye nu sum lah mea kalmac. 10  LEUM GOD El sap elos in som ac tuni lah mea orek faclu.”
11 Na elos tuh fahk nu sin lipufan sac, “Kut foroht forma fin faclu nufon ac konauk tuh na faclu arulana wanginla ku la, ac misla na.”
12 Na lipufan sac fahk, “LEUM GOD Kulana, kom tuh kasrkusrak sin Jerusalem ac sin siti nukewa lun Judah ke yac itngoulla. Ac putaka lula na kom fah akkalemye pakomuta lom nu selos?”
13  LEUM GOD El topuk lipufan sac ke kas in akwoye, 14 ac lipufan sac fahk nu sik nga in sulkakin kas ma LEUM GOD El fahk inge: “Nga arulana nunku yohk ke Jerusalem, siti mutal luk, 15 ac nga kasrkusrak sin mutunfacl su okak ac mutana in misla, mweyen ke pacl se ma nga srusruok mulat luk sin mwet luk, mutunfacl ingan tuh akyokye keok nu sin mwet luk upa liki meet ah. 16 Na pa nga foloko nu Jerusalem in tuh akkalemye pakomuta luk nu ke siti sac. Tempul luk ac fah folokyak, ac siti uh ac fah sifil musaiyukla.”
17 Lipufan sac fahk pac nu sik in sulkakin kas inge: “LEUM GOD Kulana El fahk mu siti nukewa lal ac fah sifilpa akkasrupyeyuk, ac El fah sifilpa eisla Jerusalem tuh in ma lal sifacna.”
Aruruma Ke Koen Cow Uh
18 In sie pac aruruma nga liye koen cow akosr. 19 Na nga siyuk sin lipufan se ma kaskas nu sik ah, “Mea kalmen koac inge?”
El topuk ac fahk, “Elos akkalemye ku lulap lun faclu ma akfahsryelik mwet Judah, mwet Israel, ac mwet Jerusalem.”
20 Na LEUM GOD El ikasla nu sik ac nga liye mwet orekma akosr utuk hammer. 21 Ac nga siyuk, “Mea mwet inge tuku in oru uh?”
El topuk ac fahk, “Elos tuku in aksangengye ac kunausla mutunfacl nukewa su tuh arulana itungya acn Judah ac akfahsryelik mwet we.”

1:1 Ezr 4:245:1; 6:14

1:8 Fwack 6:4; Fwack 6:2